ORANJESTAD – Seis luna pasa Sr. Tuyo Werleman, presidente di Fundacion Special Olympics Aruba, a wordo acerca door di un grupo di coredo, yama “Leave a footprint”, pa organisa un caminata pa nan di 5 y 10 kilometer, ora nan yega Aruba dia 2 di maart di 2017. E grupo ta consisti di 30 coredo.
Tur preparacion a wordo haci, y ayera diahuebs, pa 8 or, nos a busca e turista nan na e barco Adventure of the Seas, nan a subi bus y nos a transporta nan pa Hamaka, dilanti Talk of the Town.
Eynan nan a wordo ricibi pa e 3 miembro nan activo di e directiva di Special Olympics Aruba, y 12 atleta special y habitante nan di Cas Shabururi.
Door cu e parti west di Linear Park ainda tin tent, ta yen di sushi, y toilet nan holiendo masha malo, a dicidi di uza e parti oost di Linear Park.
Pa 8 or e coredo nan a sali, algun canando otro coriendo, a bay na e punto di regreso, cu tawata banda di brandweer di aeropuerto. Algun coredo a core e ruta 2 biaha pa completa e 5 kilometer.
Riba e ruta tawatin stands di awa. Na Hamaka e coredo nan por a disfruta di patia, bacoba, boter di awa y Gatorade.
A sigui un seccion di saca potret door di nos fotografo y door di e drone di Sr. Richard Lacle.
E Guest nan a ricibi di Special Olympics varios regalo,cu a wordo duna door di Sra. Netty Williams.Entre otro nan a haya un rugtas di Digicel, un serbete di Digicel,(cortesia di Digicel) pin di Special Olympics Aruba, un T-shirt di Special Olympics torchrun 2016.
Nan a saca potret tambe na e Aruba grandi dilanti Hamaka. E drone tambe a saca potret.
E turista nan y e atleta nan special a gosa hopi y a expresa cu e actividad ta un fiesta pa nan. E grupo di turista a entrega un donacion na Special Olympics Aruba. Special Olympics a ofrece nan un tayo cu e imagen di un mata di Divi divi y cu e insigna di Aruba, como recuerdo.
Pa 10 or e bus a bin busca nan pa sigui disfruta di nos isla. Gradicimento ta bay na e miembro nan di directiva di Special Olympics activo, cu ta Jeanette Netty Williams, Sr. Doy Bernabela, Sr. Karel Williams, na e boluntario nan Sra. Arelis Croes y Sra. Patricia Faro.
Un danki na nos sponsor nan cu ta Digicel, Cheng Supermarket na Bubali, y Sr. Virgilio di Fruteria Virgilio.
Danki special na Sr. Richard Lacle pa uza su drone pa e actividad y na Sr. Kevin van Ommeren di Hamaka pa facilita nos uza di su luga. Tambe un danki na Sra. Vanessa Tromp di SPO St. Cruz, su esposo y yiu, cu a bin topa e turista nan, pa cual ela yega di organisa un run den pasado, y a join nos team.
