Home Uncategorized YMCA ta ofrece lesnan di computer y di cushinamento

YMCA ta ofrece lesnan di computer y di cushinamento

SHARE

ORANJESTAD, Aruba – Faltando solamente  un siman pa e cursonan nobo di computer y cushinamento cuminsa, YMCA Dakota y YMCA San Nicolas ta invita tur esunnan interesa pa inscribi awe mes dor di yama of pasa na YMCA pa mas informacion y inscripcion. Lesnan ta costa solamente Afl. 150 pa persona pa e lesnan di computer y pa e lesnan di cushina ta bin acerca e gastonan di ingrediente, cu mayoria di biaha no ta surpasa 15 florin pa cada les. E periodo di les ta consisti di cinco siman, un biaha pa siman.

Director di YMCA Aruba Rachel Croes a subraya cu tur biaha e interes ta grandi, pues ta recomenda tur hende pa inscribi mas pronto posibel. E lesnan di cushinamento ta tuma luga riba dialuna y diaranson, esun di bolo ta riba diamars y esun di cos dushi crioyo y cos dushi moderno ta riba diahuebs. E lesnan di cushina seafood ta tuma luga tambe na YMCA San Nicolas, riba diamars y diahuebs. E cursista cu ta desea di participa na les di computer por scoge entre e programanan Word, Excel y Adobe Photoshop.

YMCA Dakota ta situa na Calabasstraat 1 y cu telefon 5823072, mientras cu YMCA San Nicolas ta situa na Pastoor Hendrikstraat 55 y su telefon ta 5845303. Na cada YMCA tin personal presente pa yuda e cursista cu su proceso di inscripcion pa e lesnan.

Young Men’s Christian Association (YMCA) ta funda dia 6 di juni 1844 dor di George Williams na London, Inglatera. Su oficina principal ta na Geneve, na Suisa. Mas di 57 miyon hende ta beneficia di e asociacion estableci den 125 pais rond mundo. E lema principal di e organisacion internacional ta empodera hendenan hoben. Bob Steele a funda YMCA Aruba 60 aña pasa dor di e necesidad pa bin cu un luga pa hobennan pa evita cu nan lo ta riba caya. YMCA tin como meta pa crea personanan util y habil den nos comunidad pa medio di brinda guia y motivacion, pa asina nan ta un influencia positivo ariba nan contemporaneonan.

YMCA ta ofrece diferente actividadnan manera campamento pa mucha, campamento pa hoben, recreacion deportivo manera p.e. volleyball y basketball y otro deporte, como tambe eventonan social. YMCA a cuminsa cu e prome “Tra’i merdia”, yama Y’s Care (YMCA Care) cu a cuminsa na Aruba 25 aña pasa cu un programa di asistencia cu huiswerk y recreo.