Home Uncategorized Ta boga pa muchanan cu epilepsia ricibi tratamento di un Neurologo

Ta boga pa muchanan cu epilepsia ricibi tratamento di un Neurologo

SHARE

ORANJESTAD, Aruba –  Recientemente Stichting Epilepsie Aruba a organisa un anochi  di informacion cu charla di 2 Neurologo di Aruba y testimonio di un pashent di epilepsia pa hopi aña. Dr. Carla Di Caudo a elabora riba un estudio cu e ta haciendo riba e situacion di epilepsia na Aruba, algo te ainda desconoci na nos pais mientras Dr. Rafael Gonzalez Redondo a trata e relacion di epilepsia y stroke.

Presidente di Stichting Epilepsie Aruba a habri e charla yamando tur hende danki pa nan presencia y a corda con e organisacion a lanta 10 aña pasa. Despues di un decada di duna informacion regularmente y haci comunidad mas consciente di e enfermedad y e formanan pa biba cune, a yega momento pa acerca Minister di Salud Publico, Dr. Alex Schwengle, riba e hecho cu muchanan te cu 15 aña cu ta sufri di epilepsia, ta ricibi tratamento for di nan dokter di cas of dokter di mucha pero NO ta ricibi un tratamento specialisa di un neurologo. E fundacion ta haya cu mester bin cambio den e sistema aki.

E prome orador tawata e neurologo Dr. Carla Di Caudo cu ta haciendo un estudio interesante di e situacion di epilepsia na Aruba. El a duna un splicacion amplio di su estudio cu aki poco tempo lo sali publica. Segun Dr. Carla di Caudo, e cantidad di persona cu tin epilepsia na Aruba ta mas o menos igual cu e situacion na Merca y Europa. E situacion na Latino America si ta mucho mas halto cu esun di Aruba.

E di dos orador tabata Janine Tujeehut, un pashent cu pa basta aña caba ta biba cu epilepsia, cu a conta cu na cuminsamento no tabata facil. Por ehempel el a haya ataca coriendo auto pero siguiendo instruccionnan di su dokter, biba un bida trankil y evita cansancio mas tanto posibel, el a logra controla su enfermedad. E sala a sigui e testimonio aki cu masha interes y a duna Janine Tujeehut na final un fuerte aplauso. Ta di dos biaha cu e ta duna tal testimonio na un evento di Stichting Epilepsie Aruba.

E ultimo orador tabata neurologo Dr. Rafael Gonzalez Redondo cu a elabora riba e relacion di epilepsia y stroke cu tambe tabata un charla interesante. El a splica entre otro cu ora un persona haya un TIA, cu cierto indicacion,  mester bay hospital mesora pasobra sino e consecuencianan por ta serio.

A funda Stichting Epilepsie Aruba na 2007 cu e meta pa brinda informacion di epilepsia na comunidad. Esaki pasobra tabata y te ainda tin un necesidad grandi di informacion riba e enfermedad aki: Kico ta epilepsia, con pa anda cune, un hende cu tin e problema aki por hiba un bida normal? Cu ayudo di entre otro dokter y otro personanan activo riba epilepsia, e fundacion riba un base regular ta tene anochi di informacion cu charlanan riba e enfermedad aki. Pa mas informacion por yama Margarita Pourier-Henricus na tel. 600-4184.