Home Uncategorized Hobencita di 15aña sospecha di asesinato of intento di asesinato, relaciona cu...

Hobencita di 15aña sospecha di asesinato of intento di asesinato, relaciona cu e caso di veneno den paki di orange juice aña pasa november

SHARE

San Nicolas – Diahuebs merdia un hobencita di Fam S di solamente 15aña, a keda deteni pa asesinato of intento di asesinato. E damita aki ta wordo sospecha di lo a pone veneno den e paki di orange juice, cu consecuencia cu un señora a fayece di dje.

E caso mes a sosode den final di November 2016, caminda un señora y un hoben ta yega Imsan cu sintomanan manera sacamento severo, indicando cu nan a come of bebe algo hopi malo.

E anochi ey mes investigacionnan a cuminsa caminda cu a bin saca afo cu nan lo a cumpra un paki di orange juice, na un supermercado pabou di Wendy’s na Cura Cabay.

Informacion cu nos ta dispone di dje, ta cu autoridad lo no a detecta nada abnormal na e supermercado. E pakinan di juice e dia of e anochi ey lo a caba di wordo saca for di caha y poni den cooler.

Esaki e ora ta cambia e scenario, indicando cu algo lo a bay “fout” na e cas mes. Di e manera ey autoridad a sigi cu nan investigacion.

Cuminsamento di e aña e señora cu ta wela di e hobencita ta fayece, pa motibo cu e veneno a causa dañonan irreparabel na su organonan.

Despues di basta investigacion autoridad ta detene e hobencita aki di apenas 15 aña di edad, sospecha di tin algo di haci cu e caso horibel aki. Tin indicacion cu mas detencion lo cay. Paso algo asina, un mucha di e edad ey su so no por bay pensa pa haci, algo hopi cruel.