Home Uncategorized EVELYN WEVER-CROES: INTIMIDACION NI MENASA TA SPANTAMI

EVELYN WEVER-CROES: INTIMIDACION NI MENASA TA SPANTAMI

SHARE

MINISTER DOWERS, STOP DI CORE, Y BIN PARLAMENTO PA DUNA CUENTA

STA CRUZ – Lider di MEP Evelyn Wever-Croes cu un tono hopi firme a reacciona riba algo insolito cu por pasa solamente na Aruba, na momento cu siman pasa un preso a trata na intimida y menasa e y su coleganan atraves di e planta nacional Telearuba. “Locual a pasa ta insolito, y cu Telearuba a coopera cu esaki cual ta hasi’e mas insolito ainda.

Lagami cuminsa cu bisa pa ningun hende hinca den su cabes pa purba intimida ami of mi coleganan ora nos ta hasi nos trabou. Nos a cuestiona e minister di husticia su maneho y e señal cu e ta manda  di ta complaciente di crimen. Nos a basa nos mes riba e decision y maneho di e minister. Locual cu nos a hasi ta locual cu pueblo ta spera di nos como representante di pueblo. Y NINGUN hende por intimida nos den esaki.

Mi no por keda sin remarca riba e papel dudoso di Telearuba nos planta nacional, cu a coopera cu algo asina insolito. Nos di oposicion apenas ta haya airtime na Telearuba y si nos haya mes ta maximo 2 minuut. Pero e persona aki a haya 6 minuut pa ataca nos y purba intimida nos libremente via nos planta nacional. Un otro punto cuestionabel ta con Telearuba a manipula cu informacion, pasobra Telearuba a skibi cu e entrevista tabata “desde KIA” pero tur hende por a constata cu e grabacion no ta hasi na KIA. Dicon Telearuba ta manipula di e forma aki?

Ami no ta reacciona riba declaracion di un preso. Cualquier persona cu kier debati cumi, mi ta invite drenta den politica prome.  Mi trabou ta controla y cuestiona Gobierno di Aruba y den e caso aki e minister di husticia cu en bes di combati criminalidad cu man duro, ta permiti criminalnan fiesta! Esaki ta mi trabou pa locual pueblo a pone nan confiansa den mi.

Pero mi kier manda un mensahe si na e Minister di Husticia Dowers. Un persona cu mi a perde tur clase di respet caba p’e, pasobra e no tin ningun interes pa tene Aruba safe. Pero awor hasta como ser humano, como hende homber, mi mester bisa cu e ta un hende cobarde cu masha poco curashi pa contesta ami ora mi cuestione, pero ta bai busca un preso pa defende. Ta realmente un berguensa grandi cu e minister mes no por defende su mes pero ta bai busca un preso pa Sali defende.

Lamentable tambe ta cu autoridadnan cu nos a acudi na nan, no a mustra interes den e caso. Procurador General di Aruba ainda no a debolbe e yamada cu e a compromete pa hasi. Esaki ta hibami na e sigiente mensahe.

Nos di MEP ta preparando pa goberna nos pais. Asina cu eleccion pasa, y MEP ta den gobierno, nos lo trese e radarnan y e helicopter bek. Nos lo duna Warda nos Costa autoridad bek pa asina nos controla nos costanan, y despues cu man duro combati criminalidad den nos pais. Esnan cu kier combati criminalidad cu man duro, ta bon bini pa keda. Pero esnan cu ta narco complaciente, crimen complaciente of tin miedo di actua, no tin lugar pa nan. MEP ta bai hasi Aruba mas sigur. Y mientras tanto ami lo cumpli cu mi trabou di controla y cuestiona e gobierno aki, cu e minister gusta of e lag’i gusta, asina ta minister Dowers, stop di core, bin Parlamento y bin duna cuenta”, tabata e palabranan di sra. Evelyn Wever-Croes