Home Uncategorized Entre empleadonan y amigonan na Garage Cordia Hans Schnog a celebra 70...

Entre empleadonan y amigonan na Garage Cordia Hans Schnog a celebra 70 aña di bida

SHARE

ORANJESTAD, Aruba –  “Cu tanto atencion mi ta sinti awe manera ta 50 of 45 aña mi tin”. Recientemente propietario di Garage Cordia Aruba, Hans Schnog a haya un sorpresa masha grandi ora cu el a yega trabao. El a topa cu un ambiente di alegria, como un gesto di aprecio y amistad di henter e staf y personal di Garage Cordia.

Schnog ta splica cu e no a spera e sorpresa aki nunca. Ora un hende haci 70 aña e kier pa e dia bay keto, el a expresa, pero el a conclui na momento cu el a topa cu e bunita celebracion “manera cosnan ta bayendo awo ta tremendo”.

Hans Schnog a cuminsa traha na aña 1969 cu su tata na Garage Cordia, cual e patriarca a establece na 1965. E compania tin un historia hopi largo. Garage Cordia a muda di e caya cu tabata conoci como verlengde Nassaustraat (awendia Caya Betico Croes) pa L.G. Smith Boulevard y despues pa e showroom y garashi actual na Camacuri.

“M’a crece hunto cu e compania, p’esey mi ta asina orguyoso. Y mi a yega un edad, mi ta 70 aworaki, pero mi ta sinti awe manera mi ta 50/45”, asina Hans Schnog a expresa. E ehecutivo carismatico, manera e mes ta splica, ta hopi contento di ta bek den “full swing” awo despues cu aña pasa el a pasa un reto cu su salud. Aunke cu pensioen y no ta den funcion diario mas, Hans Schnog regularmente ta pasa na Garage Cordia pa bebe un copi koffie of djis pa aprecia clientenan di hopi aña regresa pa sigui core den e miho auto di mundo, Toyota.