Home Uncategorized Prome luna di aña turismo a conoce crecemento den mercadonan clave

Prome luna di aña turismo a conoce crecemento den mercadonan clave

SHARE

ORANJESTAD – Conforme locual A.T.A. a splica na varios ocacion, a bin ta enfoca na un manera mas intensivo riba mercadonan –otro cu Venezuela– pa asina toch logra di compensa e perdida di Venezuela mastanto cu ta posibel, claro cu turismo cu lo nifica mas ingreso pa nos pais. Conforme desaroyo na Venezuela mester a intensiva esfuersonan aun mas. Asina A.T.A. a entre otro inverti un total di AFL. 4 miyon adicional den mercadeo na Merca. AFL. 2 miyon di esaki a wordo inverti den ultimo kwartal di 2016, dunando un extra empuhe riba mercadonan Mericano, esta New York, Boston y Fort Lauderdale. Parti di e presupuesto a bai na publicidad tradicional (TV, print, radio) y e otro mita a bai na promocion y contenido pa mercadeo online (p.e. TravelZoo, TripAdvisor, Adara).  E ‘boost’ promocional aki, combina cu esfuerzonan di socionan, a bin ta duna resultadonan desea y a energetisa e fluho di pasahero pa temporada di fin di aña y tambe pa un bon comienso di 2017. Esaki ta wordo refleha no solamente den e cantidad di bishitante si no tambe den grado di ocupacion y rendimento (ganashi) pa hotelnan, cual conforme resultadonan reporta pa AHATA pa luna di januari a mustra mihor cu aña pasa januari. Ta keda tene na cuenta cu aña pasa januari y de facto temporada halto 2016 tabata uno zwak pa diferente motibo, entre otro tempo na friu na noordoost di Merca, y introduccion di Zika.

Turismo ‘stay-over’: Januari 2017

Compara cu e prome luna di 2016, den 2017 turismo procedente for di e continente Norte America a crece cu 8.9%. Merca a subi cu 8.4%, mientras Canada a cuminsa positivamente crece cu 13.7%. E continente Norte America a trece un total di 61,629 bishitante cu ta representa 69% di nos turismo durante e prome luna di aña. Pa locual ta e continente Sur America, esaki a conoce un reduccion di 50% cu primordialmente ta debi na problemanan economico y politico na Venezuela, cu si compara januari 2016 cu januari 2017, a baha cu 68.2%. Brazil tambe a conoce un reduccion di 33.2% durante e prome luna di aña aki. E impacto di crisis di e mercado Venezolano riba nos turismo a wordo parcialmente absorbi danki na e crecemento di Colombia cu a subi cu 28.3%, sigui pa Argentina cu un crecemento di 31.7%. E continente di Sur America a trece den luna di januari un total di 18,207 bishitante, pues representando 35% di nos turismo durante e prome luna di aña. Pa loke ta Europa por nota un aumento di 3.5%. Hulanda a subi cu 10.1%, Mientras Reinonan Uni (UK) a reduci cu 11.7%. E continente Europeo a contribui cu un total di 6,857 bishitante den e prome luna di 2017,cu ta representa 6.4% di nos turismo.

Turismo crusero

Pa e prome luna di 2017, 89,647pasaheronan crusero a bishita nos isla, cual ta 11.7% menos compara cu e mesun periodo na 2016. Esaki ta encera cu nos haf a yama bonbini na un total di 44 barconan crusero durante prome luna di 2017 cual ta 8 calls menos compara cu e mesun temporada na 2016. No obstante e resultadonan di januari, 2017 ta sigui proyecta di ta uno record pa cantidad di bishitante crucero.

Turismo en general: Excluyendo Venezuela, Turismo a crece cu 5.6% durante e prome luna di aña.

Si exclui e mercado Venezolano, por nota cu den luna di januari 2016 a ricibi un total di 76,147 di bishitante, mientras cu na januari 2017 a ricibi 80,400, cu ta 5.6% di aumento di bishitante cu a yega nos isla. Si inclui e mercado Venezolano, den luna di januari 2016 a ricibi 104,072 bishitante, mientras cu na januari 2017 a ricibi 89,269 di bishitante, cu ta un reduccion di 14.2% den luna di januari 2017. Esaki ta debi cu den luna di januari e mercado Venezolano a conoce un reduccion di 19,056 di bishitante. Esaki ta 68.2% menos compara cu luna di januari 2016. Motibo di esaki ta debi na crisis economico/politico na Venezuela. Apesar di e reduccion notabel di Venezuela, por deduci cu e impacto di mercado di Venezuela ta wordo absorbi parcialmente pa mercadonan latino manera Colombia, y Argentina. Tambe mester duna atencion na e contribucion enorme di Merca na nos turismo cu crecemento exponencial di estado di Massachusets (+16.3%), Pennsylvania (+15.7%), Florida (+29.1%) y California (+46.4%). Tambe mester tuma nota di crecemento stabil di estadonan manera Georgia (+1.7%), New Jersey (2.1%) New York (+2.6%), Michigan (+7.4%) y Ohio (+10.4%). E crecementonan aki ta bai man den man cu e intensificasion den e mercadonan menciona y tambe danki na adicion di buelonan diario di for di Hollywood International Airport na Fort Lauderdale. Mester remarca cu den e prome luna di 2017, JetBlue Airlines a trece un cantidad di 17,395 pasahero pa Aruba, cu ta un crecemento di +37.5% compara cu januari 2016 (12,651 pasahero). Otro aerolineanan mericano cu a destaca cu crecemento den prome luna di januari ta United Airlines (+27.5%) y Delta Airlines (+18.1%)

Acomodacion

Aruba ta ofrece su bishitantenan un variedad di acomodacion pa aloha. Pa e luna di januari 40.7% a keda na un ‘high rise’ hotel, cu ta un aumento di 4.0% di hospedante. Pa locual ta hotelnan ‘low rise’ esaki a representa un 8.6% di marketshare, cu ta un aumento di 4.0% di hospedante compara cu januari 2016. Tipo di acomodacion timeshare a ricibi 26.5% di nos bishitantenan, cu ta un reduccion minimo di 0.3%. Mientrastanto 24.1% di e total di bishitantenan a hospeda den un acomodacion alternativo (‘other accommodations’), cu ta un reduccion di 43.3% compara cu januari 2016. Esaki ta consistente cu e ausencia di e fenomeno ‘raspacupos’ y tambe e normalisacion di e mercado Venezolano.

Economia / CBA:

Di acuerdo cu Banco Central e asina yama ‘Tourism Receipts’, pa cu e prome 9 lunanan di 2016, a contribui cu USD$1,229.17 miyon (1.2 biyon) pa cu nos economia cual ta un reduccion minimo di 0.4% compara cu cu e mes un temporada den 2015.

Hotelnan / AHATA

Segun Aruba Hotel and Tourism Association pa e luna di januari, e ‘Average Daily Rate’ (ADR) a aumenta cu 1.8% compara cu 2016. Esaki den cifra ta US$ 296.93 na 2016 compara cu US$ 302.22 pa 2017. E ganashi pa camber, e asina yama REVPAR a aumenta cu un saludabel 9.0% di US$ 235.30 na 2016 pa US$ 256.48 na 2017. E anochinan ocupa pa camber a aumenta cu 2.5%. Tambe por a nota crecemento den ‘Average Room Occupancy’ cu na januari 2016 tabata 79.2%, a aumenta pa 84.9% den januari 2017 cual ta surpasa e ‘top season’ di 2015 cu 0.1%.