Home Uncategorized Parlamentario mr. Xiomara Maduro: “Gobernacion di nos Pais ta den un...

Parlamentario mr. Xiomara Maduro: “Gobernacion di nos Pais ta den un decadencia grandisimo y nunca antes bisto”

SHARE

Dowers ta busca un criminal pa defende su incapasidad

Aruba su gobernacion ta bayendo cu pasonan grandi atras. Nos ta para financiaramente zwak, pero banda di esaki moral y eticamente e Gobierno di AVP ta destruyendo gobernacion di nos Pais. Ultimo ehempel di esaki ta e transmicion di nos planta nacional TeleAruba di e interview di e criminal Ospina kende for di KIA ta fomenta critica y odio contra Lider di Opicicion, Lider di MEP, Parlamentario y cuidadano di nos Pais, sra Evelyn Wever-Croes. Un acto baho sin presedencia na unda ta bira bisto cu Minister di Husticia Dowers no por defende su mes y ta core recuri na un criminal sera den KIA pa asina sali na su defensa. Ora cu un Minister recuri na politica baho asina of permiti tipo di intimidacion asina contra Parlamentarionan di nos Pais, bo por ta sigura cu  gobernacion di nos Pais ta den un decadencia grandisimo nunca antes bisto.

 

Criminal pa intimida Parlamentario

Den un democracia bibo, Parlamentarionan di un Pais tin tur derecho pa cuestiona un Minister di Husticia ora cu bou di su responsabilidad presonan cu no ta ‘zomaar een boef’ ta wordo otorga e beneficio di verlof. Ta na Aruba so un Minister di Husticia ta busca un criminal pa sali defende su incapasidad di maneho y pa busca moda di silencia opositor door di laga un criminal purba na intimide. Pasobra laga nos no lucbida cu Ospino ta wordo categorisa un criminal pisa cu a comete atraco arma na Aruba Bank, na RBC y na un joyeria dilanti e hotelnan highrise. Banda di esaki na 2007 y 2009 a wordo deteni pa contrabanda di arma entre Venezuela y Aruba. No lubida cu pa transporta Ospino cu KLM pa Hulanda a sera trafico full dilanto airport y a companie cu helicopter pa corte ya cu tabata tin rumor cu lo pone un auto yena cu bomb den lobby di un hotel grandi pa desvia atencion y pa e por scapa. Esaki ta e tal Ospino aki cu banda di tur esaki a tene man cu ex Minister Oduber pa haya horta 11 mil dollar di placa di Pueblo via Banco Central di Aruba pa un plantacion di strawberry cu no a mira luz di dia. Esaki ta e criminal cu Minister Dowers kier usa como arma contra su opositornan Parlamentario di nos Pais. Y esaki ta e criminal cu TeleAruba como nos planta nacional di televicion ta duna prime airtime den noticia pa purba na intimida un Parlamentario di Pais Aruba. Esta un berguensa y rotzooi sin presedencia.

 

Desaproba rotzooi

Señores ki mishi Minister di Husticia ta usa un criminal pa su defensa? Ki mishi Telearuba ta bay interview un preso pa bin purba intimida un Parlamentario di nos Pais? Ta cu ki intencion e director di e planta, e directora di noticia y e ministernan encarga ta pasa e interview aki den prime time? Unda e condena di e director di Setar a keda? Señores di Ministerio Publico ta cuanto rotzooi mas ta bay wordo consenti na Aruba? Y unda Eman su despabrobacion ta? Un criminal cu a burla di nos Pueblo cu atraco arma, cu a transporta arma ilegal pa Aruba esey boso kier trece na nivel pa bin cuestiona representante di e Pueblo di Aruba? Bay ta complice di criminalidad na e Pais aki! Locual boso ta permiti pasa aki ta hinca nos Pais den un DECADENCIA grandisimo. Nos ta DESAPROBA e ROTZOOI aki y ta haci un apelacion fuerte na Pueblo pa haci mescos. Desaproba e decadencia aki den gobernacion cu tardi of tempran lo afecta TUR hende na Aruba.