Home Uncategorized MEP ta busca solamente candidato cu ta pone ARUBA prome

MEP ta busca solamente candidato cu ta pone ARUBA prome

SHARE

Partido MEP a tuma nota cu awor no ta solamente AVP a para bira contrincante di MEP, sino tur partido chikito cu ta lanta manera paddestoel. A para bira cu hendenan ta drenta politica, y join partidonan chikito, djis pa ataca MEP. Esaki ta un tendencia hopi particular y peligroso mustrando indicacion di ta partido satelite di AVP.
Sinembargo MEP ta manda un mensahe pa tur. MEP tin UN mision: core cu e gobierno mas malo cu nos pais a conose, cu ta e gobierno di Mike Eman. Y despues trese progreso y bienestar pa tur cuidadano di nos pais. Nos tin un plan y nos tin tur confiansa den e vision y liderasgo firme di nos lider sra Evelyn Wever-Croes, cu nos lo logra esaki. Talves tin hende no ta gusta su postura firme di “no non-sense”, pero ta hustamente esey nos pais tin mester awor pa saca nos pais di tanto problema.

MEP lo no desvia di su mision pa atende cu otro asuntonan cu no ta den linea cu su vision, ni tampoco cu ex candidatonan cu a dicidi pa nan propio motibonan di bandona e linea y vision di partido.
MEP ta buscando candidatonan nobo pa hunto cu esnan cu mas experiencia forma E lista victorioso. MEP ta considera candidatonan cu ta drenta politica pa principio y pa traha pa Aruba. MEP no ta considera candidatonan cu ta drenta politica pa purba tur color di regenboog y sigur no esnan cu tin solamente nan propio interes na pecho.
MEP ta un partido humilde, di pueblo y pa pueblo y hunto cu bo lo percura pa un gobierno integro pa brinda siguridad y proteccion na tur cuidadano di nos pais.