Home Uncategorized MEP: PRESO TA MANDA MENASA DESDE KIA PA LIDER DI MEP

MEP: PRESO TA MANDA MENASA DESDE KIA PA LIDER DI MEP

SHARE

TELEARUBA TA COOPERA CU E ACTO CONDENABLE AKI!

Diabierna ultimo un acto insolito a pasa na Aruba. Un preso a usa nos planta nacional pa durante Telenoticia pa manda menasa di 6 minuut pa lider di MEP Evelyn Wever-Croes. Por cierto, Telearuba apenas ta permiti parlamentarionan di oposicion 2 minuut leew leew, pero un preso ta haya 6 minuut.
Mas tristo di tur esaki ta cu ningun autoridad a actua, ni a tuma e cos aki na serio, demostrando un biaha mas cu criminalnan ta fiesta na Aruba y ta nan ta manda.
E preso kier a reacciona riba e hecho cu lider di oposicion a cuestiona maneho di minister Dowers di husticia. Ta trata e caso den cual e minister a duna “verlof” na un preso cu apenas algun tempo pasa a wordo considera como sumamente peligroso, y tabata hasta teme pa su bida y mester a traslade pa Hulanda pasobra na Aruba nan no por a garantisa su seguridad.

Apenas tres anja despues e mesun persona aki, sintando su castigo di 7 anja, ta haya e permiso pa sali di prison, bishita su casa y hiba su yiunan scol.
Esaki a lanta hopi comocion den henter comunidad, y un di esnan cu a cuestiona e asunto aki tabata e lider di MEP. Sra. Wever-Croes no a cuestiona e preso su derechonan, sino como parlamentario a cumpli cu su deber y responsabilidad di cuestiona e maneho di e minister y especialmente ki señal e minister ta mandando pa mundo criminal. Oposicion na mas di un ocasion a urgi gobierno pa manda e señal cu criminalnan ta wordo gara cu man duro, pero e gobierno constantemente ta mandando un otro señal.
E preso en cuestion durante 6 minuut a manda un mensahe pa lider di MEP cu ta contene bastante menasa. Den e entrevista cu e preso a duna DESDE KIA, e ta splica dicon e ta sinti cu e tin derecho riba e verlof, cual ta su bon derecho. Sinembargo, desde ki dia presonan ta duna entrevista desde KIA? Director di KIA ta na altura di esaki? Director di Telearuba ta na altura di esaki? Directora di noticia na telearuba ta na altura di esaki? Dicon ningun a hasi un investigacion?

Si e preso en cuestion a lag’e te eynan talves no tabata tin problema, pero el’a sigi y hasta a menasa y insulta e lider di MEP. El’a duna e lider di MEP un aviso pa stop di papia di su caso.

Esaki ta un atentado directo contra democracia di nos pais.
Pero e mas tristo ta cu e preso en cuestion a defende e minister Dowers, bisando con bon minister Dowers ta pa e presonan, y ta oposicion ta esun cu ta molestia e criminalnan. Esaki ta demostra e falta di hombresa di minister di husticia, cu e mes no kier atende cu politiconan, pero ta usa presonan pa atende cu su oponentenan!
Biniendo di e criminal di mas peligroso na Aruba, ta di spera cu autoridad actua contra e abuso aki den KIA pero especialmente Telearuba. Un planta nacional cu ta permiti tipo di bahesanan asina, no merese di wordo yama un planta nacional, sino mas bien un planta criminal.