Home Uncategorized Joseph Furst, Wynwood BID: ‘Motivacion di Gobierno pa stimula sector priva manera...

Joseph Furst, Wynwood BID: ‘Motivacion di Gobierno pa stimula sector priva manera tin na Aruba, bo no ta wak tur caminda’

SHARE

ORANJESTAD – Joseph Furst ta kere cu ta algo hopi bon cu na Aruba tin un Prome Minister cu ta enfoca pa pusha iniciativanan pa stimula crecemento di sector priva y revitalisacion di barionan. Furst ta conoce tambe di esaki como cu e ta traha cu e grupo cu a revitalisa barionan cu awe ta destinacionnan conoci rond mundo manera Soho na New York y Wynwood na Miami. E tabata di bishita riba nos isla siman pasa pa conoce Oranjestad y su alrededornan riba peticion di Gabinete Mike Eman. E idea ta pa wak e potencial cu nos capital tin pa por ripiti e bon practicanan cu por laga Playa haya mas vida comercial, residencial y cultural.

Como Managing Director di Goldman Properties y na mesun momento President di Wynwood BID (Business Improvement District), Joseph Furst tin hopi conocemento y experiencia di con pa laga un bario crece economicamente dor di crea e conexionnan corecto entre comercio y artistanan cu ta atrae mas publico pa e areanan aki. Durante su dia di djis un par di dia na Aruba, el a señala caba algun bentaha cu nos capital tin y cu por traha cune. E prome ta e boluntad di parti di e sectornan publico y priva y e di dos ta e cultura unico di nos isla.

“Ta un bunita luga, nos ta contento di ta akinan. Tin tremendo arkitectura y un gran historia cu nos ta purbando di conoce miho pa wak con nos por tuma esey y hib’e dilanti den bida moderno na Aruba,” asina Furst a bisa. “Un di e cosnan cu nos ta haya hopi interesante ta con diverso e cultura akinan ta y cu e hendenan ta bin for di asina tanto luga rond; esey ta algo cu mester wordo celebra.”

Den e compania Goldman Properties, Furst ta hopi biaha e persona di contacto cu Gobierno di, p.e. Miami. Basa riba su experiencia, el a bisa cu ta fantastico e situacion na Aruba pasobra na Merca e gobierno no ta envolvi y tur cos ta bin for di sector priva. Pesey, e hecho cu en berdad tin un sector publico aki na Aruba cu ta motiva pa purba yuda stimula e crecemento di sector priva y e revitalisacion di barionan, ta algo cu hende na Miami ta papia di dje cu lo ta bon pa sosode, pero no ta pasa.

Aruba ta e unico isla cu Goldman Properties ta trahando cune. Furst ta admiti cu nan ta haya hopi interes pa comparti nan ‘best practices’ y nan experiencia pa influencia otro hendenan cu por haci un diferencia pa e comunidadnan cu nan ta biba aden. Ademas di a haci un recorido den centro di ciudad, Furst y Jessica Goldman, CEO di Goldman Properties tambe a reuni cu Minister President Mike Eman y Minister di Asuntonan Economico mr. drs. Richard Arends y nan ekipo. Tambe a duna un presentacion na representantenan di sector bancario, comercial, emprendedornan y mentenan creativo.