Home Uncategorized Elton Lioe-A-Tjam (ABO): Cuaresma ta un periodo di reflexion. No uno di...

Elton Lioe-A-Tjam (ABO): Cuaresma ta un periodo di reflexion. No uno di ‘Smoke Screen’ y ‘Sigue la fiesta’

SHARE

Mientras cu hopi hende tabata ocupa cu carnaval, un partido politico a dicidi di lansa un otro ‘Smoke Screen’, pa asina desvia atencion riba e declaracionnan/acusacionnan serio di e minister di Husticia, y unda ningun denuncia a wordo entrega te awe. Un ‘Smoke Screen’ pa pone un parti di pueblo lubida cu aki tin declaracionnan/acusacionnan hopi serio y unda tin politiconan ‘niet zomaar iemand’ envolvi. Un ‘Smoke Screen’ cu ta abusa di e hecho cu un parti di e pueblo ta lubida lihe (porcierto algo cual e mesun politiconan tradicional a introduci).

Si nan gusta of no, nos lo keda informa pueblo cu un otro siman a pasa, despues cu e minister di Husticia a haci su declaracionnan/acusacionnan pisa, y keto bay ningun denuncia of algo similar a wordo entrega na Ministerio Publico (OM), pa asina cuminsa investiga locual a wordo declara publicamente. Straño cu poco atencion ta wordo duna na e asunto aki pa cierto medionan di prensa. Parce manera esaki ta un aña electoral, hopi esfuerso ta wordo haci pa laga pueblo lubida e declaracionnan/acusacionnan aki lihe. Pero a pesar di e esfuersonan aki y cu algun hende kier haci comosifuera cu e declaracionnan/acusacionnan tabata nada otro cu gritonan ‘emocional’ y politico di e titular di Husticia, nan ta keda declaracionnan/acusacionnan serio haci pa un ‘niet zomaar iemand’ na e adres di un otro ‘niet zomaar iemand’.

Pa pone e asunto aki den un contexto mas completo, nos lo uza un noticia cu a sali publica. Siman pasa, nos por a mira con un miembro di parlamento Curasoleño, a pasa un otro miembro un bon wanta. No mucho tempo despues, Ministerio Publico a anuncia un investigacion y detencion a cay. Tambe e lider di e partido di e miembro cu a pasa e wanta, a sali duna un declaracion publico di e asunto y a splica cu e miembro den cuestion, lo tuma un descanso politico.

Aña pasa, no wanta pero mokete a cay den nos parlamento. Pueblo por a mira con e presidente y vice-presidente tabata acusa otro. Un pelea entre un homber y un señora. Un pelea entre dos miembronan di e mesun partido. Pero mira e diferencia entre e dos casonan di Corsou y Aruba. Aki na Aruba, Ministerio Publico no a anuncia ni un investigacion despues di e halamento di conopi y ningun detencion a cay. E lider di e partido politico, na cual ambos  protagonista tabata pertenece, no a duna un declaracion publico. Ningun di e dos bringado a, of a wordo manda pa tuma un descanso politico. Ningun medida a wordo tuma contra e dos bringado. Tampoco pueblo a tende algo di Ministerio Publico, despues cu ambos bringado a bay entrega keho. Y te awe, ambos bringado ta cana rond manera nada a pasa. ‘Business as usual’.

Loke nos ta mirando aki, ta un falta di decencia, moralidad, integridad, etica y bon ehempel. Tur cos cu antes tabata abnormal y cu ningun hende decente tabata acepta, awendia a bira algo normal. Pueblo no por warda riba un otro WODC investigacion of cualkier otro, cu lo costa tempo, placa y cu lo tin e mesun resultado unda tur protagonista ta sali liber. E actitud aki, e arogancia y e menosprecio di e politico tradicional pa pueblo, hunto cu e postura ambivalente di un parti di pueblo a causa hopi daño material, economico y social caba. Ta esaki ta e raiz di hopi di nos problemanan cu nos experenciando awendia y di cual poco kier papia di dje.

Dos siman a pasa y ainda pueblo ta wardando pa mira seriedad di parti di esunnan envolvi. Pueblo kier mira esunnan envolvi, of Ministerio Publico, haci lo corecto y cuminsa duna e bon ehempel porfin. Ministerio Publico mester actua, siendo cu e declaracionnan/acusacionnan ta serio, a wordo haci publicamente pa e minister di Husticia y teniendo cuenta cu esunnan envolvi no ta ‘niet zomaar iemand’. No ta importa cuanto huma nan lo kier genera cu e ‘Smoke Screen’, nada lo por cambia locual a sosode, locual a wordo declara pa e minister di Husticia of e berdad. E periodo di carnaval ta tras di lomba y awor ta cuminsa e periodo di cuaresma. Un periodo di reflexion y sanacion. No uno di ‘Smoke Screen’, Cobardia y ‘Sigue la fiesta’.