Home Uncategorized Curt Heronimo di Caribbean Mercantile Bank: “Definitivamente banco ta para tras di...

Curt Heronimo di Caribbean Mercantile Bank: “Definitivamente banco ta para tras di inversion y ta apoya tipo di iniciativanan aki”

SHARE

ORANJESTAD – Senior Account Manager di Caribbean Mercantile Bank N.V., Curt Heronimo a sali cu un grado halto di positivismo for di e presentacion duna recientemente dor di e compania responsabel di revitalisacion di entre otro Wynwood na Miami y con esaki ta un caso cu por ripiti na Oranjestad. E ehecutivo bancario ta contento di wak cu ta bin cu iniciativa asina cu ta fomenta inversion y crecemento economico. Heronimo, ademas di otro representantenan di sector bancario, comercial y mentenan creativo di nos pais tabata invita na e presentacion cu a tuma luga siman pasa na Oficina di Innovacion.

Aunke Heronimo no ta familiar cu e storia di Wynwood previo na e presentacion, ora el a haya e invitacion, a busca mas informacion y asina a conoce ken ta Goldman Properties, nan trayectoria, inversionnan exitoso y a keda impresiona. “E ta un incentivo, algo cu ta pone bo pensa ‘outside the box’, con pa haci dealnan similar pa revitalisa un area of districto,” el a bisa.

Banconan, manera Caribbean Mercantile Bank N.V. ta institutonan cu kier traha na bienestar di inversion. Nan ta wak e oportunidadnan y basa riba esey ta wak hunto cu e cliente prospecto, e idea y prognosis pa bira un exito. Di otro banda ta haya e clientenan potencial y den e presentacion nan a haya idea y strategia pa bay dilanti. Segun Heronimo, despues mester trece ambos hunto, cual ta un papel cu Gabinete Mike Eman II ta dispuesto pa facilita.

Manera Jessica Goldman di Goldman Properties a bisa, e proceso ta uno riba termino largo, pero trahando den un esfuerso colaborativo y kedando persistente, ta logra. E compania desaroyador mes tin mas di 30 aña. Den decada 80 a revitalisa Soho na New York, na decada 90 a revitalisa Miami Beach y mas recientemente Wynwood na Miami.

“Mi ta sostene iniciativa asina y contento cu un plan asina cu ta trece hendenan di afo caminda nos no mester reinventa e wiel; djis wak loke nan a haci nan Wynwood y awo nan ta comparti nan expereiencia cu nos,” asina e ehecutivo bankero a finalisa bisando.