Home Uncategorized POST ARUBA TA PRESENTA UN SOUVENIR PA RECORDA ‘E AÑA...

POST ARUBA TA PRESENTA UN SOUVENIR PA RECORDA ‘E AÑA NOBO CHINES – AÑA DI GAY 2017’

SHARE

ORANJESTAD, Aruba – 24 di februari 2017: Dia 28 di februari 2017 Post Aruba N.V. ta presenta un serie nobo di stampia den forma di un souvenir pa recorda ‘E Aña Nobo Chines – Aña di Gay 2017’.

E souvenir ta consisti di 2 stampia balora na 200 cen y 420 cen, cu ta yega na un prijs total di Afl. 6,20 y e ta acompaña pa su ‘envelop di prome dia di emision’ cu ta costa Afl. 7,70.
E diseñonan pa e stampia aki ta un creacion di Rudberth Wolff y e stampianan ta imprimi na Johan Enschedé Security Print.

Riba e souvenir cuadra “Aña Nobo Chines” cu e tema “Aña di Gay” tin potret di 2 stampia cu un Gay y un Dragon. E dos dibuhonan aki ta inspira for di un estilo tradicional Chines y nan ta representa un toke Caribeño.
E fondo ta un inspiracion di tangram: un wega Chines na unda for di 7 piesa geometrico bo mester forma figuranan cu ta ser pidi.
E caracternan Chines ta simbolisa ‘Feliz Aña Nobo Chines’ y e zodiaco ‘Gay’.

E ‘Aña Nobo Chines 2017’ ta proclama como e ‘Aña di Gay’.
Den astrologia Chines cada aña no solamente ta asocia cu un signo di animal, pero tambe cu un di e cinco elementonan: oro (metal), palo, awa, candela y tera.
E souvenir aki ta representa un fusion di e aspectonan di tangram: color di Aña di e Gay, e baile di Dragon y e Gay.

E tangram (puzzel Chines di 7 piesa) di e gay ta aparece riba e ‘Diseño di E Prome Dia’, mientras por mira leu den fondo un otro tangram di e Gay. E colornan pa e “Aña di Gay” ta oro, maron y geel. Nan a uza e idea pa corta papel for di tangram, pa asina por analisa e souvenir completo den un serie di composicion di colornan di tera cada bes y pone nan hunto pa completa e souvenir.

Tangram
Tangram na Chines ta nifica literalmente “shete plachi di habilidad”. E ta un puzzel pa analisis, cu ta consisti di shete forma plat, cu nan ta yama tans. Ta pone nan hunto pa asina nan haya un forma of patronchi. E obhetivo di e puzzel ta pa yega na un forma specifico, cu ta duna djis un bista general of e silueta, door di uza tur shete piesa sin cu un ta pasa riba e otro.
Na China nan a inventa e puzzel aki durante e dinastia Song y esaki a keda traslada pa Europa pa e barconan comercial na principio di siglo XIX. E tabata masha popular na Europa pa un tempo y despues un biaha mas durante e prome guera mundial. E ta un di e puzzelnan mas popular di analisis den mundo. Un sicologo Chines a yama e tangram “e prueba psicologico mas antiguo di mundo”, a pesar cu e ta traha mas bien pa entretenimiento cu pa e analisis.

Dragon
E dibuho di Dragon ta representa baile di Dragon. E ta un forma di baile tradicional y presentacion den e cultura Chines cu tambe bo por observa den e celebracion festivo. E bailadonan ta realisa e baile cu por cierto ta forma un imagen largo flexibel di un Dragon cu ayudo di e palonan cu ta poni na un distancia regular for di otro banda di e largura completo di e Dragon. E grupo di baile ta simula e movimientonan imaginario di e spirito di e riu.
Cu frecuencia nan ta balia e baile di Dragon durante e Aña Nobo Chines. Un simbolo di China, cu un firme creencia cu e ta trece felicidad pa hende. P’esey, mas largo e Dragon ta den baile, mas suerte e lo trece pa comunidad.

E souvenir ta obtenibel entrante 28 di februari 2017 na e diferente oficinanan di Post Aruba, respectivamente na Oranjestad, San Nicolas, Sta. Cruz y Palm Beach Plaza Mall.
Pa mas informacion tocante e stampianan ‘E Aña Nobo Chines – Aña di Gay 2017’, por tuma contacto cu Departamento Filatelico di Post Aruba N.V., cu ta situa na J.E. Irausquinplein 9, Oranjestad, cu su number di telefon 528-7678, of bishita su pagina di Facebook Aruba Stamps.
E bunita souvenir aki no por falta den bo coleccion. Busca esun di bo awe mes, ya cu e cantidad ta limita.