Home Uncategorized Accidente pisa na Paradera ta laga dos persona herida atras, cual un...

Accidente pisa na Paradera ta laga dos persona herida atras, cual un di nan su situacion ta serio

SHARE

Paradera – Dialuna marduga tur unidadnan di rescate ta wordo manda dilanti Great Rich Bar Restaurant na Paradera cu urgencia.

Un accidente hopi serio a sosode caminda dos auto a dal frontal.
Ta trata di un Toyota Yaris y un Subaro.

Na e sitio nos a papia cu e chauffeur di e Subaro y ela conta nos cu e tawata bayendo direccion rotonde Paradera y e Toyota Yaris direccion Piedra Plat.

Ela sigi conta nos cu e yegando e crusada pariba di Great Rich e Yaris cu velocidad halto a bay trata na drenta e caya pariba di e restaurant, pero no ta logra y ta dal fronta contra e Subaro color cora.

E dos ocupantenan di e Yaris ta keda seriamente herida. Na yegada nos por a wak e chauffeur pafo di e auto ariba acera drumi y cu basta sla y sanger na curpa y tawata keha di dolor. E pareha den e Yaris ainda tawata tin shirt di Carnaval bisti, pues esaki por ta un indicacion cu nan lo tawata bayendo cas y cansancio lo por a hunga un rol.

E dama pasahero a keda geklem den e auto, den e posicion hopi fastioso. Unidad di brandweer mes ora su personal a bay den accion y ta corta parti di e auto, pa asina saca e dama.

Na e sitio a presenta tres ambulance, mirando cu tin tres persona envolvi, pues dos den e Yaris y e chauffeur di e Subaro, cu no a sali illeso for di e desgracia.

Cu urgencia e dos ambulancenan a sali direccion hospitaal cu e ocupantenan di e Yaris.
Specialista di trafico a wordo pidi tambe na e sitio.

E dama su situacion ta critico.