Home Uncategorized E boto ‘Women on Waves’ di e grupo Hulandes cu ta provee...

E boto ‘Women on Waves’ di e grupo Hulandes cu ta provee abortus a wordo prohibi di drenta Guatemala

SHARE

Guatemala – E boto conoci como e ‘boto di abortus’ di e grupo Hulandes, Women on Waves, ta ofrece abortus gratis na muhernan di paisnan unda e procedura aki ta prohibi.

E manera cu Women on Waves ta provee abortus ta door di hiba e muhernan aki pafor di e teritorio di e pais, pues den awanan internacional nan ta haci e procedura. Nan ta haci esaki te cu e prome 10 siman di e embaraso indesea.

Diahuebs pasa e boto a wordo confisca. E ehercito, bou instruccion di Presidente Jimmy Morales, a prohibi e grupo di haci e procedura aki. Autoridadnan a preveni e activistanan di baha for di e boto y tambe a prohibi muhernan di subi e boto.

E grupo di Women on Waves a bisa cu nan tin permiso legal pa drenta e awanan teritorial di Guatemala y cu e boto a wordo ‘deteni’ ilegalmente. E plan inicialmente tawata pa keda 5 dia na Guatemala.

Segun e grupo, mas cu 60.000 abortus ilegal ta tuma lugar anualmente na Guatemala. Nan a splica cu e muhernan aki ta persona di menos recurso y cu ta pone nan bida na peliger paso esnan cu ta haci e procedura no ta experto medico.

E activista Hulandes cu a funda Women on Waves, Sra. Rebecca Gomperts, a bisa cu e acto aki ta uno cu puro intecion pa intimida.