Home Uncategorized Gobierno Mericano a prohibi CNN, BBC y varios otro organisacion di noticia...

Gobierno Mericano a prohibi CNN, BBC y varios otro organisacion di noticia di ta presente durante conferencia di prensa

SHARE

E Cas Blanco a prohibi varios miembro di prensa di ta presente pa Sean Spicer su conferencia di prensa. Sean Spicer, e vocero di e Cas Blanco, a prohibi: New York Times, CNN, The Hill, Politico, Buzzfeed, The Daily Mail, BBC y varios otro organisacion di noticia di ta presente pa un reunion.

E accion aki ta confirma e posicion di Presidente Trump contra media. Riba varios ocasion Trump a tilda media di ta publica ‘fake news’ y a declara cu media ta e ‘enemigo di e pueblo’.

E ‘Asociacion di Corespondientenan di e Cas Blanco’ ta protestando e decision aki. E presidente di e asociacion, Jeff Mason, a pidi pa coleganan den prensa cu si a wordo permiti pa atende e reunion pa comparti e informacion cu nan a haya. E agencia di Associated Press (AP) y Time a dicidi di boycot e reunion pa motibo di e decision tuma.

Organisacionan cu si a logra drenta ta inclui: The Washington Times, One America News Network y tambe Breibart. Mester nota cu Breibart ta un medio conservativo conoci pa publica noticianan cuestionabel, pues informacion cu popularmente por wordo categorisa como ‘conspiracy theories’.

E acto aki ta uno peligroso y ta mustra un actitud dicatorial.  CNN a declara cu “esaki ta un desaroyo inaceptabel di parti e Cas Blanco.” Y cu esaki ta nan manera di tuma represaya ora cu CNN raporta e hechonan cu nan no gusta.