Home Uncategorized Fraccion di MEP a reuni cu Minister di Husticia riba e tema...

Fraccion di MEP a reuni cu Minister di Husticia riba e tema di abuso sexual di menor

SHARE

Diaranzon Parlamentarionan di MEP, kendenan ta miembro di Comision di Husticia a reuni hunto cu e comision na unda a wordo trata e tema di abuso sexual di menor.

Den ultimo añanan nos sa cu e problematica di abuso sexual di menor a bin ta escalando te un average di 2 caso di abuso pa siman.

Nos Fraccion a haci diferente pregunta pero e dosnan principal tabata:

  1. Kico ta e maneho riba e tereno di delitonan contra menor muy en especial abuso sexual contra menor.
  2. Kico ta e pensamento di Ministerio Publico riba introduccion di castigo minimo contra esnan cu comete abuso sexual contra menornan

Partido MEP ta di pensamento na introduci un straf minimo y cu ta duna hueznan e oportunidad di desvia na duna esaki bou di e condición cu nan mester argumenta nan decision na manera amplio pe comunidad compronde y respeta nan decision.

Mas o menos 6 aña pasa, nos a entrega un ley di iniciativa na unda nos ta pidi pa bin cu castigo minimo pa criminalnan cu ta comete e hecho castigabel aki contra nos menornan di edad. Sinembargo, nos no a haya oido y e ley aki te ainda ta sinta den lachi na Parlamento.

Den e reunion di Comision, nos a puntra si awe, despues di 6 aña, ainda e pensamento di Ministerio Publico y di e parlamentarionan di AVP ta mescos. Nos a puntra si ainda nan ta kere cu castigo minimo no por wordo aplica den caso di abuso sexual di mucha mirando e hecho cu e problema aki a crece so.

Preocupacion di MEP ta grandi pa cu e gravedad di abuso sexual di mucha. Y ta pesey MEP lo keda sostene tur grupo y fundacion manera esun di Lisette Gomez cu ta protesta contra abuso di menor. Nos ta keda scucha comunidad. Y nos tin e plan di solucion pa asina ataca e problema aki y asegura cu tur abusador haya castigonan mas halto.

MEP lo percura pa tin vertrouwensarts 24/7 pa tuma prueba mesora. Nos lo enforsa KZP cu personal y material pa nan por haci investigacionnan mas lihe. Y tambe nos lo bin cu castigo minimo pa e abusadornan haya castigo mas severo! Esaki ta MEP su compromiso pa e lucha contra abuso di mucha.