Home Uncategorized Sr. Richard Blewitt di ‘United Nations Development Programme’ orador principal na ‘Aruba...

Sr. Richard Blewitt di ‘United Nations Development Programme’ orador principal na ‘Aruba Sustainable Action Forum’

SHARE

ORANJESTAD – Sr. Richard Blewitt Resident Representante di United Nations Development Programme (UNDP) ta orador principal ‘Aruba Sustainable Action Forum’ cu ta tuma luga diamars 21 di februari na Crystal Theater. Na diferente ocasion representantenan di Nacionnan Unia a expresa nan admiracion pa e vision di ‘Gobierno di Aruba’ pa crea un sociedad sostenibel y prosperidad comparti. Pa e motibo aki Nacionnan Uni ta trahando cu lasonan fuerte cu Gobierno di Aruba pa implementacion di e ‘Metanan pa Desaroyo Sostenibel’ (SDG’s) aki na Aruba.

E ‘Metanan pa Desaroyo Sostenibel’ a wordo adopta pa 163 estado miembro di Nacionnan Uni na fin di 2015 durante un Asamblea General. Prome Minister Eman tabata presente na e ceremonia aki y a firma den nomber di Reino Hulandes, loke ta haci cu Aruba tambe den un forma boluntario a compromete su mes pa implementacion di e ‘Metanan Mundial pa Desaroyo Sostenibel’ pa 2030. E aliansa fuerte entre Gobierno di Aruba cu Nacionnan Uni, specialmente cu United Nations Development Programme, a cristalisa den accionnan real ora a establece ‘Aruba Center of Excellence for Small Island Development States’. E centro di excelencia aki tin como meta importante pa captura e conocemento acumula aki na Aruba relaciona cu Desaroyo Sostenibel y comparti esaki cu otro islanan cu tambe ta riba e mes un proceso pa yega na sostenibilidad di nan mesun comunidad. Pa e motibo aki UNDP ta sostene Aruba su ambicion pa implementa e metanan mundial.

Durante ‘Aruba Sustainable Action Forum’ Sr. Richard Blewitt lo elabora mas riba e aliansa fuerte cu Aruba tin cu Nacionnan Uni pa implementacion di e Metanan Mundial pa 2030 y e rol di ‘Aruba Center of Excellence’ den e proceso di comparti conocemento acumula cu islanan rond di mundo. Pa esaki e Comision Nacional pa implementacion di e Metanan Mundial aki na Aruba ta invita tur esnan interesa pa asisti na e foro cu ta tuma luga diamars 21 di februari for di 8.30 am pa 12.00 pm na Crystal Theater. Pa participa por registra na sdgaruba@kabinet.aw