Home Uncategorized Refineria di Aruba (RDA) ta contento di mira mas di 100 trahado...

Refineria di Aruba (RDA) ta contento di mira mas di 100 trahado nobo Trabounan di rehabilitacion ta cuminsando na CITGO Aruba

SHARE

ORANJESTAD, Aruba – 19 di februari 2017: Despues di a firma e acuerdo principal aña pasa, a sigui e proceso den cual Refineria CITGO Aruba ta scoge e consorcio di contratista principal, cu na su turno lo scoge e contratistanan local y trahadonan local pa cuminsa traha. E proceso ey a inicia awor y Refineria di Aruba, siendo e doño di e infrastructura tabata contento di experencia entrega di algo mas cu 100 badge diabierna ultimo pa empleadonan nobo den e refineria.

Diabierna mainta e Lab-Building di Refineria CITGO a sirbi como centro di encuentro pa un grupo di trahadonan nobo cu ta den servicio awor pa e rehabilitacion di e planta di petroleo. Tur esaki a sosode den presencia di Prome Minister mr. Mike Eman, Minister di Energia Ing. Mike de Meza, Minister di Labor, Drs. Paul Croes y Office Manager di Refineria Di Aruba N.V. (RDA), Francie Solognier-Croes hunto cu Herbert Mensche y Phill de Souza, tambe di Refineria di Aruba. Durante e encuentro Refineria CITGO a parti badge pa e empleadonan nobo.

A emplea mas cu 100 hende na Refineria CITGO pa medio di 4 diferente contratista grandi. Tin mas contratista na caminda, pues lo emplea mas trahado tambe. Actualmente Refineria CITGO ta haciendo e prome fase di trabaonan di rehabilitacion cu ta encera preparacion y inspeccion como tambe calculacion di costo cu tin cu haci y defini ki tipo di trabaonan tin cu prepara pa por bay ehecuta e proyecto.

Pa haci esaki lo contrata hopi trahado local. Den e siguiente simannan lo nota cu mucho mas hende lo haya trabao den diferente ramo cu awor ta limita na empleadonan den inspeccion, mecanica, ingenieria, planificacion y calculacion di costo. Cu tempo lo mira cu e trabao ta bay bira mas grandi y lo mira hopi lihe un escala di funcionnan cu lo wordo contrata pasobra trabao den refineria ta multi disciplinario. Ta premira den e lunanan nos dilanti lo emplea centenares di hende mas na trabou. Pa fin di aña lo surpasa 1000 hende trahando. Ya caba tin poco mas di 200 hende trahando den e refineria.

Hecho ta cu Refineria di Aruba (RDA), siendo un compania estatal, ta doño di henter e refineria. E trabaonan di RDA ta pa supervisa tur loke ta tuma luga riba tereno di e refineria ya cu nan ta doño di e compleho. RDA awor ta manehando e terenonan cu antes tabata pertenece na Refineria Valero pero cu a bay bek pa Gobierno. A haci e terenonan limpi y evalua e forma di mas util pa uza nan.

Francie Solognier-Croes, Office Manager di RDA, a expresa cu nan ta contento di mira e prome paso… “y nos ta felicita CITGO Aruba cu esaki. Naturalmente pa nos ta hopi great di mira tatanan di famia, mamanan di famia ta hayando trabao den refineria y poco poco e cantidad di empleadonan lo crece. Intencion ta pa e refineria draai di tal forma cu pronto mas contratista lo haya chens pa ofrece nan servicionan y manera menciona caba, esaki ta djis e prome paso di cual nos ta hopi contento di mira”.

Desde dia 1 di october 2016 Gobierno a funda Refineria di Aruba N.V. cu tin e concesion pa maneha e refineria, e terenonan y ta supervisa e huurdo, CITGO Aruba Refinery, den nan operacionnan diario. Alvin Koolman, un experto den e industria petrolero, ta na cabes di e compania, cu ta doño tambe di Fuels Marketing & Supply Aruba cu ta maneha distribucion di gasolin, diesel y fuel oil pa nos pais.