Bogota,Colombia, – Diadomingo pa mas o menos 10 or y mey habitantenan y esnan presente den e bario di La Macarena ta scucha un explosion hopi fuerte, esaki a sosode den cercania di Plaza de Toros, den centro di Bogota. E explosion aki a laga un total di cuarenta persona herida, dos persona a keda gravemente herida, entre e heridonan tabata tin 10 polis. E heridonan a wordo atendi na e Hospital Militar, Central de la Policía, San Ignacio y Santa Clara .
E explosion a keda registra na Carrera 5 con Calle 32, aparentemente ta trata di un artefacto explosivo cu a explota na momento cu un caravana di polis tabata pasando na La Macarena. E area mesora a wordo cera pa asina polis por haci mas investigacion. Varios establecimento den e area a keda afecta, mescos tambe algun viviendanan a sufri daño, varios glas y bentanan a keda destrui door di explosion fuerte.
Actualmente e caso aki ta bou investigacion y no por bisa ainda ta ki tipo di explosivo a wordo detona. E alcalde di Bogota, Enrique Peñalosa a bay na e sitio y dilanti di e reporteronan presente ela priminti di persigui y detene e terroristanan responsabel pa e hecho aki y tambe a desmenti cu un tabata tin un victima cu lo a fayece.
Autoridad no tin niun evidencia ainda, pero probablemente e explosion por ta conecta directamente cu e Corrida Taurina, recientemente a cuminsa bek cu e actividadnan aki na Bogota. Esaki a causa consternacion fuerte entre esnan cu ta gusta e evento llama Fiesta Brava y e defensornan di animalnan.
E alcalde Peñalosa a confirma cu pa den oranan di atardi e corida di Toro lo sigui normal, tambe ela asegura tur esnan cu kier acudi na e evento, cu nan por acudi sin miedo.
