Home Uncategorized Desde dialuna awor dia 20 di februari Lo tin cambionan den trafico...

Desde dialuna awor dia 20 di februari Lo tin cambionan den trafico entre crusada di ex Drive Inn pa crusada di Mahuma En conexion cu trabounan riba Green Corridor

SHARE

ORANJESTAD, Aruba – 19 di februari 2017: En conexion cu trabounan necesario rond di construccion di e “Green Corridor” lo haci algun cambio entrante dialuna 20 februari 2017 riba e caminda principal di Oranjestad pa San Nicolas for di crusada di Mahuma te cu rotonde di Seroe Thijshi. Lo cera e caminda grandi aki for di e crusada “T” pabou di e crusada di Mahuma te cu e crusada na altura di ex Drive In. Tur esaki entre 9:00am pa 11:00am, pa asina por haci e cambionan.

E cambionan riba e caminda principal ta cu lo desvia trafico biniendo for di aeropuerto, net despues di e brug di Mahuma, di e caminda existente pa e caminda nobo te cu net prome cu e rotonde di Seroe Thijshi. Tene cuenta cu lo desvia trafico biniendo for di ex Drive-Inn, net prome cu rotonde di Seroe Thijshi, di e caminda existente pa e caminda nobo (manera e ta actualmente) y despues di e rotonde e ta keda riba e caminda nobo te despues di e crusada di Mahuma.

Pa loke ta e mita rotonde na e crusada di Mahuma, eynan trafico biniendo for di Santa Martha (Santa Cruz) riba e mita rotonde di Mahuma  na e crusada di Mahuma, por bay man drechi so, pues direccion aeropuerto. Trafico yegando for di aeropuerto lo no por bira na man robes riba e mita rotonde di Mahuma. Lo desvia trafico for di Mahuma (banda pa zuid) for di banda di e brug na Parkietenbos, pa tur truck y bus via Cas Paloma, Simeon Antonio y na haltura di Jo-anne Restaurant pa tur trafico via e caminda di santo cu ta sali na Simeon Antonio, conoci pa hopi hende como Peppep. Trafico for di ex Drive-In si por bay man drechi y direccion aeropuerto riba e mita rotonde  na altura di e crusada di Mahuma.

Den caso di e automobilistanan cu subi rotonde di Seroe Thijshi, mester tene cuenta cu lo desvia trafico for di aeropuerto net prome cu e rotonde for di e caminda nobo pa e caminda existente riba Hoofdverkeersweg y despues di e rotonde lo sigui riba e caminda existente. Lo desvia trafico for di ex Drive-Inn net prome cu e rotonde for di e caminda existente (Hoofdverkeersweg) pa e caminda nobo. Lo habri e caminda nobo cu ta conecta Barcadera cu Seroe Thijshi, pa asina trafico por sigui move mas eficiente y lihe.

E departamento di planologia di Cuerpo Policial di Aruba ta spera cu automobilustanan y tur cu ta participa activamente den trafico lo tene cuenta cu e cambionan aki, den cuadro di e trabaonan avansando riba e Green Corridor. Si tin cualkier pregunta of ta rekeri mas splicacion, por yama e specialistanan den trafico na Polis libremente.