Home Uncategorized Embahada Venezolano na Irak a bende paspoort y visa cu personanan liga...

Embahada Venezolano na Irak a bende paspoort y visa cu personanan liga cu gruponan terorista, esaki CNN en Español a descubri durante un investigacion

SHARE

Toledo, Spaña – Misael Lopez di 41 aña tawata traha como e consehero legal di e embahada Venezolano na Irak. E cabayero ta residencia actualmente na Spaña y ta tema pa su bida tur dia pa motibo cu e divulga secretonan cu su gobierno kier tene scondi.

E a raporta locual e ta pensa ta un plan pa bende paspoort y visa pa miles di dollar for di e embahada. Tambe e a splica cu riba varios ocasion cu e a wordo ofreci parti di e placa, pero e a rechasa esaki pa motibo di no kier tuma parti den e actonan aki. E gobierno Venezolano a nenga e acusacionan di Mr. Lopez y esaki a cay como un sorpresa pe.

CNN y CNN en Español a traha hunto y a haci un investigacion di 1 aña largo y nan a descubri varios incidentenan straño andando cu e entregamento di visa y paspoort. Tambe nan a bin conclui cu paspoort a wordo duna na personanan liga cu gruponan terorista.

Tur esaki nan a bin descubri despues di a investiga miles di documento y tambe entrevista varios persona na Merca, Spaña, Venezuela y tambe Reino Uni. Un documento confidencial cu CNN a haya ta conecta Venezuela su vice-president Tareck El Aissami cu e 173 paspoort Venezolano y ID duna na individuonan di medio oriente, incluyendo personanan di e grupo terorista, Hezbollah.

Mester nota cu e paspoort Venezolano ta permiti entrada na mas di 130 pais, sin cu mester pidi visa. Esaki ta inclui nos isla Aruba. Tambe persona cu paspoort Venezolano ta haya acceso na 26 pais den Union Europeo.

Despues cu e reportahe aki di CNN a wordo publica y transmiti tambe riba nan canal di television e gobierno Venezolano a manda kita e canal for di aire.  E president Venezolano, Nicolás Maduro, durante un discurso televisa a acusa CNN di ta instiga president Trump contra dje.

Segun e president Maduro: “CNN y e departamento di estado [Mericano] ta purba di impone un politica robes contra Venezuela. Nan ta promoviendo un intervencion general y masivo, y tambe un agresion contra Venezuela.”