Home Uncategorized Parlamentario mr. Xiomara Maduro: Parlamentarionan di AVP mester habri wowo y...

Parlamentario mr. Xiomara Maduro: Parlamentarionan di AVP mester habri wowo y mente pa e realidad

SHARE

Nos Pais ta den un abismo financiero debi na e falta di responsabilidad y e maneho descabeya di e Gobierno di AVP. Tur esaki danki na e Parlamentarionan di AVP cu no a haci nan trabou di controla y keto bay ta ciego pa e realidad. Ultimo aki mes nos ta wak con Sneek ta purba bruha tera riba e carta di CAFT sin cu ela sikiera lesa e documento of sin cu ela publica e carta di CAFT pa Pueblo mira.

AVP a bin cu CAFT

Ta tristo pa mira Sneek ta insinua atrobe cu ta MEP a bin cu CAFT pa Aruba. Un ridicules ya cu Sneek mes a chercha di nos rapport ‘Feestvierend Ten Ondergaan’ y awe kier bisa cu ta e rapport aki a pone precion pa Hulanda pone Eman bou curatela. Sneek parce di ta ciego y foi tino ya cu e no kier mira y realisa cu ta su propio Lider Eman mes a firma Protocol cu Donner, Acuerdo di Diabuebs Santo y a duna ok na e carta di Geen Bezwaar di Yrausquin den cual nan a firma y bay di acuerdo pa bay bou supervicion financiero di CAFT. Ademas Sneek a lubida caba cu e mes a vota VOOR pa CAFT bira realidad na Aruba. Ban serio, no ta MEP, pero ta AVP a bin cu CAFT pa nan duna e percepcion cu finanzas publico ta bou control. Ta ki prueba mas di e realidad Sneek ta ciega pa wak?

Papia sin lesa carta

E ta un berguensa pa mira Sneek purba bruha tera riba e ultimo carta di CAFT siendo cu ningun hende a wak e carta aki pa por confirma cu locual Eman ta papia ta berdad. Si acaso mes cu Sneek a lesa e carta caba, dicon e tambe tine scondi pa Pueblo? Si e informacion di CAFT ta asina bon, dicon tin tanto scondemento asina? Pa bo sali defende Eman na un manera ciego asina djies papia sin lesa carta, ta un berguensa grandi y gastamento di fondo publico na paga salario di un Parlamentario cu no ta haci su trabou di control.

Habri wowo y mente pa e realidad

Mihor cos cu Sneek y sobra Parlamentarionan di AVP por haci ta habri nan wowo y mente pa e realidad. Eman a malogra nos Pais cu un MEGADEBE te pone Aruba bou supervicion financiero di CAFT y bou e capa aki a trece nos Pueblo den un pobresa creciente. Nos ta haci un apelacion na Sneek y cs pa pone un paro na e weganan infantil aki di bruha tera of busca MEP pa culpa pa erornan di AVP. Busca manera pa bira serio y pa cumpli cu e trabou di control. Ya caba e Pueblo di Aruba a sufri suficiente. Ta momento pa cambia rumbo di nos Pais y riba e caminda aki no tin lugar pa e ciegedad di Sneek y e otro Parlamentarionan di AVP cu no kier habri nan wowo y mente pa e realidad.