Home Uncategorized Otro caso di tiramento : Persona riba brommer a persigui y tira...

Otro caso di tiramento : Persona riba brommer a persigui y tira varios biaha riba un auto

SHARE

Venezuelastraat – Diaranson anochi un dama ta haye ta yama polis momento cu un brommer tawata pasa tira riba un auto y a dal contra di su auto. E dama a splica cu e a caba di busca su casa for di trabou y nan tawata na caminda pa cas ora cu nan a haya nan mes envolvi den e caso peligroso aki.

E brommer tawata persigui un otro auto y e persona (o personanan, no ta sigur si ta uno of ta dos) riba e brommer a cuminsa tira varios biaha riba un auto. Na prome instante e señora a kere cu e tironan tawata zonido di klapchi.  Durante cu esaki tawata pasando e brommer a pasa dal contra e dama su auto na e banda di pasahero y a rasce anto sigui bay.

Na yegada polis ta encontra un brommer benta mey mey di caminda y tambe nan a haya varios huls. E persona (o personanan) cu a tira lo mester a laga e brommer atras y a huy. No ta conoci ainda si kizas un auto por a pasa y yuda ‘nan’ huy o si ta na pia ‘nan’ a huy. Asistencia di departamento tecnico y recherche a ser pidi.

Mientras cu polis tawata na Venezuelastraat, un dama a bin basta spanta y a pidi polis pa bay na un adres na Madiki pa un posibel tiramento. E persona aki lo tin un relacion cu un di e personanan cu ta envolvi den un di e problemanan aki. Ora polis a bay na e adres situa pariba di Anglo Kleuterschool nan no a topa cu nada y tampoco niun huls.

Cubastraat – Prof. Lorentszstraat

Polis mester a bay tambe na un adres un poco mas pazuid di e caminda unda e incidente a sosode. Aparentemente, segun informacion haya na e sitio, cu persona (o personanan) riba brommer lo a pasa tira riba e cas.

Polis a cera e caya parcialmente pa asina haci nan investigacion y busca huls.

Tin indicacion cu e casonan aki tin di haber di cu un ‘reglamento di cuenta’, pues tin un problema grandi andando. Mester nota cu ja tin algun siman cu tin diferente caso di tiramento andando den e mesun area, un dia prome caba 11 tiro a cay riba un cas y un auto. E problemanan aki ta keda un peliger pa tur hende den e bario.