Home Uncategorized QUOTA INTERNATIONAL OF ARUBA CU CAMPAÑA DI CUIDO DI OIDO NA SCOLNAN

QUOTA INTERNATIONAL OF ARUBA CU CAMPAÑA DI CUIDO DI OIDO NA SCOLNAN

SHARE

Manera custumber, miembronan di Quota International of Aruba ta den pleno campanja di cuido di oido. Quota ta bishita varios scol basico, pa hunto cu sr. Glenn Rock di WEB, duna informacion riba e importancia pa nos muchanan cuida nan oido. E presentacion cu nan ta duna ta hopi interactivo, y interesante. Ta splica e alumnonan con e oido ta funciona, y con grandi e riesgonan ta cu sonido demasiado halto por causa na nan oido.

Quota a bishita dos scol caba, Colegio Felipe B. Tromp y scol primario Kudawecha, y presidente di Quota sra. Gwen van Trikt-Rojer y sra. Ivy Simon-Hernandez, director of service, ta gradisi directiva di e scolnan pa nan cooperacion. Den e dos simannan nos dilanti tin mas scol riba agenda. Ta hopi importante pa nos muchanan sa di trempan con importante e ta pa nan cuida nan oido.