Home Uncategorized Prome Minister Mike Eman a traspasa mando na Prins & Pancho

Prome Minister Mike Eman a traspasa mando na Prins & Pancho

SHARE

ORANJESTAD – Diadomingo mainta a tuma luga Traspaso di mando na Prins y Pancho di Carnaval. Dilanti di edificio di Bestuurskantoor, e figuranan mas prominente di Carnaval 63 a bini hunto y prensa local a cubri e ceremonia caminda Prome Minister Mike Eman ta pasa e liderasgo di pais Aruba pa celebra e fiesta mas grandi di nos cultura.

President di SMAC, comision organisador di Carnaval, Shanon Henriquez a hiba palabra gradiciendo Minister President Eman pa su apoyo y sosten na Carnaval di Aruba. Despues cu Prins y Pancho a presenta nan decretonan pa cu e maneho cu lo hiba, Premier Eman a felicita nan comentando riba varios punto.

Na final, e mandatario a gradici nan y tur otro figura di Carnaval pa nan participacion y contribucion pa engrandece nos celebracion anual. “Danki pa guia e Carnaval aki cu tanto humor y tanto entusiasmo,” a bisa particularmente na e Prins y Pancho, gradiciendo tambe tur e talentonan musical.

Presente tabata Sra. Carnaval, Julie Tromp; Reina Grandi, Sabina Rey; Reina Hubenil, Ileyna de Cuba; Reina Infantil, Evah Ras; Prins Infantil ‘Por’, Li-Angelo Quandt & Pancho Infantil ‘Mas’, Shaiyron Alexander; Prins Hubenil ‘Bo Tin’ Giomar Leocadia y Pancho Hubenil ‘Curashi’ Lixander Lambrinos; Prins Grandi ‘Milk’ Randy Hernandis y Pancho Grandi ‘Shake’ Roberto Hernandis y tambe ganadornan di Tumba y Caiso/Soca infantil y hubenil.

Prome Minister ta desea henter pueblo di Aruba un temporada di Carnaval hopi creativo y alegre, pero tambe hopi responsabel y sigur. Ta keda na cada un di nos pa sigui resalta cu ‘Carnaval di Aruba si ta Carnaval.’ Biba Aruba su Carnaval.