Home Uncategorized Yvette Geerman di Departamento di Salud Publico ta adverti: Ta controla pisa...

Yvette Geerman di Departamento di Salud Publico ta adverti: Ta controla pisa riba cumplimento cu reglanan di higiena Specialmente durante temporada di Carnaval

SHARE

ORANJESTAD, Aruba –  Durante temporada di Carnaval ta realisa diferente control specialmente na eventonan grandi unda ta bende of prepara cuminda. Departamento di Salud Publico (DVG) ta basta activo den e temporada aki y nan Seccion “Dienst Warenkeuring en Hygiene” tabata presente durante e Caiso & Soca Monarch.

Yvette Geerman di Seccion “Dienst Warenkeuring en Hygiene” a duna di conoce cu nan tabata presente den diferente actividadnan cu a tuma luga, manera e pre-finalnan di Caiso & Soca Monarch, Parada di Mucha na Noord etc.. Locual nan ta haci ta controla si e cumindanan cu ta wordo prepara na e forma corecto, si durante preparamento e proceso e ta wordo hasi na un manera pa evita cu algo por bay robes y cu un hende por bira malo, esta proteha comunidad di alimento cu por haci nan malo. Personal di Seccion “Dienst Warenkeuring en Hygiene” a haci nan inspeccion y a controla e cushina- y barnan durante e evento.

Segun Geerman, DVG ta hopi satisfecho. E carchinan di salud tur tabata na ordo y a constata cu a cumpli cu regla di higiena manera stipula. A controla tambe temperatura di e cuminda, pa e cuminda ta na e temperatura adecuado. Esaki ta un di e factornan cu por pone cu e cuminda ta bomba of daña.

Durante e inspeccion a duna nan e tipsnan y e guia corecto pa por mantene e temperatura corecto. “Como Salud Publico nos t’ey pa proteha comunidad eyfo y esey ta locual nos ta haciendo. Durante añanan nos ta dunando informacion, tips, sugerencia”, e hefe encarga cu Seccion di “Dienst Warenkeuring en Hygiene” a duna di conoce. El a remarca cu tur ta bayendo den un bon direcion. No a yega ainda unda mester ta, pero ta hopi satisfecho como salubridad publico y nan lo sigui guia unda cu mester.

Durante e actividadnan di carnaval cu ta bin DVG lo sigui cu e inspeccion pa garantisa cu ta cumpli cu reglanan di higiena y si ta cumpli cu ley, tanto riba e rutanan di carnaval como durante e actividadnan den e luganan manera stadion, asina Yvette Geerman di e Seccion di “Dienst Warenkeuring en Hygiene” a duna di conoce.