Home Uncategorized Hopi expectativa pa LED Lights den bario Accion di Bario di Prome...

Hopi expectativa pa LED Lights den bario Accion di Bario di Prome Minister for di Jaburibari pa Moko tabata uno exitoso

SHARE

A constata tambe cu hopi habitante ta practica Agricultura basa riba filosofia di gobierno pa promove sostenibilidad

ORANJESTAD – Prome Minister Eman hunto cu funcionarionan di diferente departamento gubernamental a cuminsa Accion di Bario na Jaburibari e siman aki y a caba esaki den Moko, unda cu den oranan di anochi a instala e prome LED Light di e bario.

Compaña pa algun habitante di e area mes, e mandatario a cana pasando diferente cas unda cu el a papia no solamente cu Arubiano pero tambe cu otro persona cu a haci di Aruba nan cas, manera un pareha kende ta bisa cu nan ta sinti nan mes “Arucamba” y ta sinti un orguyo grandi di por a ricibi un Prome Minister na nan cas.

Tambe e mandatario a constata durante e bishita aki cu den e area di Moko e habitantenan ta sigui cu su vision y esun di su Gobierno di practica sostenibilidad. Mayoria ta haci esaki pa consumo propio, tambe por a constata cu propietarionan di ‘Mi Dudu Bar Restaurant’ na Moko tin un cultivo chikito, unda ta planta comcomber, batata dushi, pampoena y yambo.

Habitantenan di e bario a expresa di ta hopi contento cu e hecho cu e decision a cay pa cuminsa pone luz den e bario, ya cu iluminacion ta masha importante pa e ciudadanonan, principalmente esnan cu ta yega cas den oranan laat di anochi. “E ta algo cu nos ta aprecia y gradici Prome Minister y su Gobierno pa esaki,” Darren Kelly a expresa durante e canamento den bario.

ELMAR a order 12 mil LED light di cual 9 mil ta pa cambia e luznan bieu di cayanan rond Aruba mientras cu e resto ta pa crea puntonan di iluminacion nobo. Segun por a compronde, mas cu 2 mil Luz LED nobo a wordo instala caba e aña’ki. Tur siman e mandatario ta combina e Accion di Bario cu instalacion di luznan den bario y esaki ta algo cu el a bin ta haciendo pa basta aña caba. Awor cu tin mas luz disponibel, e ta wordo poni tur siman riba agenda. “E programa di Luz den Bario mester yega den tur skina di Aruba,”Prome Minister Eman semper ta expresa.