Home Uncategorized Amnistia Internacional a descubri cu 13.000 persona a wordo horca pa e...

Amnistia Internacional a descubri cu 13.000 persona a wordo horca pa e gobierno Sirio

SHARE
Damascus, Siria  – Segun e organisacion Amnistia Internacional, miles di persona a wordo asesina na un prison Sirio. E prison aki ta un prison militar situa na Saydnaya, Damascus. E ta un lugar cu ta wanta miles di hende, incluyendo prisoneronan politico y tambe miembronan di e grupo ‘Muslim Brotherhood’.

Ta wordo bisa cu un cantidad di 13.000 persona a wordo horca, mayoria consistiendo di sostenedor di e oposicion politico di e gobierno Sirio. Un rapport nobo di grupo pa derechonan humano ta bisa cu e masa di horcamento a tuma lugar tur siman na prison di Saydnaya. Nan tin evidencia cu esaki a sosode entre e luna di september 2011 te cu december 2015.
Aministia  Internacional a declara cu e likidacionan a wordo autorisa pa e nivel di mas halto di e gobierno Sirio. Den pasado caba e gobierno a nenga cu nan a haci esaki, pues di a maltrata/tortura y asesina personanan cu nan a detene.
Un aña pasa expertonan di Nacionan Uni a cuminsa declara caba cu tin abusonan ta sosode. Nan a colecta documentacion y a papia cu varios testigo y e investigacion aki a prueba cu tin un tipo di genocidio ta wordo cometi.
Amnistia Internacional a logra intrevista 84 hende, incluyendo e prisoneronan y ex-trahadornan di e prison pa asina traha e rapport aki. Segun nan rapport tur siman, mayoria biaha ta dos bes pa siman, gruponan grandi di 20 pa 50 persona  ta wordo asesina den secresia.
Prome cu e detenido nan wordo likida nan ta wordo treci dilanti un corte militar. Un ex-hues di e corte militar a conta cu e detenidonan lo wordo puntra si e a comete e crimen y si e ta un si of no ,toch e lo wordo huzga pa e crimen. Pues sin haci un investigacion formal pa prueba e culpabilidad, e persona ta wordo sentencia. Segun e ex-hues, den e tipo di cortenan aki regla di ley no ta conta.
Riba dia di e horcamento e detenidonan ta wordo treci na un prison civil y lo wordo tortura pa 3 ora largo. Despues di esaki marduga ta tapa cara di e detenidonan y ta hiba nan den un otro camber. Aki ta caminda nan ta wordo bisa cu nan a haya un sentencia di morto y ta wordo horca.
E curpa di esnan cu a wordo horca ta wordo pone riba un truck y manda pa un hospital militar situa na Tishreen, Damascus. Aki nan ta registra e curpa pa asina e wordo dera den un graf masal riba e tereno militar.