Home Uncategorized Despues di a haya hopi peticion, Prome Minister Mike Eman a instala...

Despues di a haya hopi peticion, Prome Minister Mike Eman a instala comision pa evalua realisacion di un Centro di Bario pa Santa Cruz

SHARE

Recomendacionnan mester keda entrega aki 3 luna

ORANJESTAD – Dialuna atardi, Prome Minister Mike Eman tabata na veld di ‘Rockets Baseball Organization’, caminda cu hunto cu su colega Minister di Deporte, dr. Alex Schwengle, a inaugura e instalacion di e prome den un serie di ‘batting cages’ cu ta bay wordo instala riba veldnan di Baseball rond di Aruba. Na e ocasion tambe, sr. Eman a probecha di anuncia, instalacion di un comision cu ta bay evalua realisacion di un Centro di Bario pa Sta. Cruz.

“Awe Mainta mi a firma un decreto ministerial despues di a scucha hopi club deportivo y organisacionnan social cu ta bisami cu Santa Cruz tambe mester di un Centro di Bario. Y awe nos a instala e comision cu ta bay yuda nos haci e evaluacion, con nos por realisa un Centro di Bario pa Santa Cruz. E por ta acopla na e veld aki (Rockets), e por ta na Estrella, e por ta na Connie Francis, no ta na nos pa dicidi, pero nos kier haci un bon investigacion di e posibilidad pa crea un centro di Bario pa Santa Cruz,” Minister Mike Eman a enfatisa.

Despues cu a inaugura e ‘batting cage’ na ‘Rockets Baseball Organization’, na Sta. Cruz, dentro di poco ta cuminsa construccion tambe di MFA Sta. Cruz, cu ta bay inclui Hulpbestuurskantoor di Sta. Cruz y tambe servicionan importante pa e bario, districto y Aruba en general.

E miembronan di e comision cu ta bay evalua un Centro di Bario pa Santa Cruz ta sra. Suzette Kock, sr. Atan Lee, sr. Tyson Lopez, sr. Oscar Bislip, sr. Curt Croeze y sr. Andres ‘Modechi’ Werleman. E comision tin di entrega su recomendacionnan aki tres luna.