Home Uncategorized EVELYN WEVER-CROES: COORDINADOR TIN SALARIO DI 9 MIL Y HOBEN CU...

EVELYN WEVER-CROES: COORDINADOR TIN SALARIO DI 9 MIL Y HOBEN CU CABA DI STUDIA TIN SALARIO DI 4 MIL FLORIN!

SHARE

“Coordinadornan di gobierno ta gana un promedio di 9.000 florin pa luna, pero un hoben cu caba su HBO ta gana 4.000 florin y un hoben cu caba su master ta gana 4.900 florin. Esaki ta frustrante pa nos hobennan”

 

Gabinete Mike Eman ta sigi abusa di e situacion financiero di nos pais, y den esaki ta faya nos hobennan tambe. Ta importante pa tur hende ta conciente cu Mike Eman no ta hasiendo nada pa mehora e situacion di pais Aruba. Su unico solucion ta mas medida. E anja aki atrobe, por mira den e presupuesto cu Gabinete Mike Eman tin 325 coordinador den servicio! Y te dia di awe nan no ta splica dicon nan mester di asina tanto coordinador. Tempo cu MEP tabata den gobierno, na anja 2009, sr Nelson Oduber tabata tin 17 persona ta traha na su despacho. Mike Eman tin mester di 113 persona, cu ta 96 hende MAS cu sr. Nelson Oduber tabata tin mester, y sr. Nelson Oduber a goberna nos pais mucho mas mihor cu Mike Eman. Pa colmo, cu un salario average di 9 mil florin pa luna!

 

MINISTER MIKE EMAN Y PAUL CROES TA FAYA NOS HOBENNAN

Esaki ta un bofta den cara di hopi di nos hobennan cu ta lucha pa caba nan estudio, pero no por haya trabou. Hopi hoben ta molestia cu esaki, pasobra nan SI a studia, nan SI ta traha duro y carga responsabilidadnan grandi, pero nan no por haya e salario aki. Otronan, sin ningun studio, ta yega y gana 9 mil florin pa luna. Esunnan cu haya trabou mes, cu caba HBO ta gana 4.000 florin pa luna, mientras cu esunnan cu caba Master ta gana 4.900 florin pa luna. Pero un coordinador sin ningun clase di studio, ta gana 9.000 florin pa luna. Esaki ta frustrante pa nos hobennan cu a studia y cu mester paga nan fiansa di studio bek. Minister Mike Eman y minister Paul Croes a faya nos hobennan. Ki senjal nos ta duna nos hobennan cu esaki?

 

SOLUCION DI MEP: INVERTI DEN NOS HOBENNAN

MEP ta kere cu prome e ministernan mester baha nan gastonan y despues bo por pidi pueblo pa hala faha mara. Nos no ta haya husto cu ta pueblo mester sigi entrega, y e ministernan mes y esnan serca di nan ta sigi biba dushi.  E plan di MEP ta simple:

Stap 1: baha e cantidad di minister di 9 pa 7 minister, y bo ta scapa 17 miyon florin

Stap 2: baha e cantidad di coordinador y bo ta scapa 24 miyon florin

Stap 3: baha e gastonan di biahamento, huurmento, propaganda y abogado, y bo ta scapa 9 miyon florin

Asina den 3 stap sensiyo, bo ta scapa 50 miyon florin SIN cu bo mester bai na pueblo cu mas medida. Por inverti e 50 miyon aki atrae nos hobennan cu a studia den exterior pa bin Aruba bek, y yuda nan cu nan fiansa di studio; yuda nan set up nan negoshi; yuda nan haya un trabou. Asina e hoben por pone den practica e ideanan inovativo cu e ta bin cune. Nos hobennan merece mihor”, lider di MEP a finalisa bisando.