Home Uncategorized Awor bo tambe tin oportunidad di “Sirbi bo pais – Bira Polis”...

Awor bo tambe tin oportunidad di “Sirbi bo pais – Bira Polis” Por solicita te cu dia 15 di februari

SHARE

ORANJESTAD, Aruba – Den cuadro di nan maneho pa recluta y engrandece e Cuerpo di Polis di nos pais, recientemente Scol pa Polis a habri vacatura pa tur esunnan interesa pa bira Polis, por solicita. Ta acepta aplicacion te cu dia 15 di februari, pues ta pidi tur esunnan interesa pa pasa yena un aplicacion na Scol pa Polis na San Nicolas, situa na Fort Heuvelstraat 25,

 

Pa por solicita pa Polis, e aplicante mester tin nacionalidad Hulandes, mester tin entre 17 pa 34 aña di edad, midi minimo 1.60 meter y mester un diploma di minimal MAVO.

 

Por pasa solicita na Scol pa Polis di dialuna pa diabierna entre 8:00am pa 4:00pm. Mester trece 2 pasfoto recien, copia di e diplomanan, lista di puntonan y un copia di Bo paspoort. Si tin mas pregunta por bel na 584-8282 of manda un e-mail pa adminpoi@kparuba.com.

 

Anualmente Polisnan ta baha cu pensioen, pa cual e academia Policial mester percura pa entrega Polisnan nobo, bon prepara, entrena y cu entusiasmo pa sirbi nos comunidad. Cada biaha cu habri posibilidad pa solicita, ta haya centenares di hobennan interesa, pa cual atrobe ta spera di conta cu e mesun interes pa bira un defensor di ley.

 

Cuerpo Policial Aruba ta existi desde aña 1986 y ta conta awendia cu mas o menos 600 Polis trahando incansablemente pa brinda siguridad na nos pueblo. Ta trata aki di 375 hende homber, 104 hende muhe y 120 empleado administrativo, trahando den 4 districto, cu Warda nan di Polis situa na Oranjestad, San Nicolas, Noord y Santa Cruz.

 

Orguyosamente Cuerpo Policial Aruba ta conta cu hopi respet internacional, specialmente pa su unidadnan special manera “Motor Unit”, “K9 Unit”, “Arrestatie Team”, “Mobiele Eenheid”, “Duik Team” y “Rapid Response Team”, sin lubida e departamentonan conoci di patruya y recherche cu ta bon entrena y capaz pa investiga y soluciona e casonan mas complica. Den Caribe, e cuerpo di Polis di Aruba tin un nivel hopi halto di e porcentahe di casonan criminal soluciona y hiba na Corte.

 

Cuerpo Policial Aruba ta traha den cooperacion estrecho cu Cuerponan di Polis den Reino Hulandes manera Korps Politie Rotterdam Rijnmond, KLPD y RST, sin lubida otro partnernan internacional manera Interpol, DEA, FBI, RCMP, Force Protection Agency, ACCP y IACP. Pa mas informacion por subi e website www.kparuba.com of “like” nos Facebook riba https://www.facebook.com/korpspolitiearuba.