Home Uncategorized Mireille Sint Jago (MEP): Hooijboer ta Minister di Enseñansa di Aruba of...

Mireille Sint Jago (MEP): Hooijboer ta Minister di Enseñansa di Aruba of Minister di International School Aruba??

SHARE

Cu Minister Michelle Hooijboer-Winklaar a dicidi pa regala miyones di subsidio pa ehecuta e programa educativo GED na International School Aruba, ISA, un scol priva, ta un decision inaceptabel! Placa di Pueblo mester bay pa scolnan publico, pues scolnan di DPS of un scol di SMOA, SKOA of SPCOA, cu ta yuda Gobierno cu e tarea pa educa pueblo di Aruba.

E discusion no ta si nos mester ofrece e programa di GED na Aruba – pa contesta e articulo di René Herde den 24 Ora.com – e discusion ta si e subsidio di miyones di placa di pueblo mester bay pa un scol priva!! Minister Hooijboer-Winklaar mester maneha e Cartera di Educacion den un forma cu e ta beneficia e mayoria di nos pueblo y cu ta demostra di ta un manera logico, husto pa inverti placa di pueblo. René mester puntra Minister Hooijboer-Winklaar PAKICO un Minister di Enseñansa di Aruba a scoge pa  regala un scol PRIVA, International School Aruba, e programa di GED, aunke na Merca y na Canada semper e programa di GED ta wordo ehecuta na un scol PUBLICO of na un Centro Comunitario.

E subsidio di miyones pa e proyecto di GED por a wordo ofrece na un scol den e Districto cu tin mas scol na Aruba: E districto di San Nicolas!! Na San Nicolas tin 4 Scol pa Mavo: Colegio San Augustin y Filomena College di SKOA, John Wesley di SPCOA y Abraham de Veer di DPS. Mi a verifica esaki riba e website di ea.aw, caminda tin 9 scol pa Mavo so menciona. Ya  caba esey ta 4 di e 9 scolnan pa Mavo. Ademas tin EPB San Nicolas y Colegio San Nicolas cu tambe ta cay bou di DPS. Hasta na e scol priva Ibero, lo tin alumno cu por beneficia di e programa GED aki. Pues 7 di e 14 scolnan pa educacion secundario na Aruba ta na San Nicolas. Si bo ta tuma bo trabou como Minister di Enseñansa na serio, con bo por scoge pa regala miyones di subsidio na International School Aruba na Wayaca?

Ta conoci tambe cu na San Nicolas e alumnonan ta domina e idioma Ingles riba un nivel hopi mas halto cu e resto di Aruba. E manera cu e idioma di Ingles ta wordo papia y pronuncia na un manera diferente y cu e ta yama Sani English, no por wordo uza como argumento contra di esaki. (Pa contesta e argumento infunda di Sr. Zee den Amigoe.) Den cada pais rond mundo tin districto cu tin un manera tipico pa papia y pronuncia e idioma nacional. Pues, pa tuma e decision pa regala un scol den un area caminda no tin otro scolnan pa MAVO ta un decision straño! E lugar ta keda den Wayaca caminda ni autobus ni Arubus ta yega, tambe un poco straño toch? Nos ta papiando di studiante cu no a logra haya un diploma y cu probablemente no tin transportacion propio.

Mi por hasta imagina mi, cu e proyecto di GED lo por wordo ehecuta na por ehempel IPA, caminda tin experticio pedagogico, cual lo por resulta den un guia cu por wordo brinda na e grupo di studiantenan cu ta mas specialisa. Of Hooijboer por a pensa mas logico y implementa e programa di GED na EPI, caminda e mayoria di e studiantenan lo bay sigui nan estudio despues di logra nan certificado di GED. Na EPI tin sectornan, pues maestronan cu ya caba ta duna les na Ingles pa decadanan largo caba! René Herde y Michelle Hooijboer-Winklaar por bay hunto na e restaurant eynan y pidi kico cu nan kier.

Si tur e sugerencianan aki no ta laga Minister Hooijboer-Winklaar revoca su decision pa regala ISA miyones cu e programa GED aki y asina derocha placa di pueblo. Si ainda e kier faborece un scol priva cu placa di pueblo, e ora ey e lo mester pensa si e ta un bon idea pa crea un situacion den cual SU integridad por wordo cuestiona, atrobe, pavia di su lasonan priva cu International School Aruba. Pasobra asina’ki e ta parce cu Michelle Hooijboer-Winklaar ta mas bien Minister di International School Aruba enbes di Minister di Enseñansa di Aruba. Nos yiunan merece un bon Minister di Enseñansa di Aruba, ami kier hasta bisa cu ta tempo pa nos tin un Minister di Enseñansa cu en berdad ta un Minister di Enseñansa!! Pueblo, pensa bon pa ken bo ta vota! Pami e ta importante pa informa bo debidamente. Nos ta den aña di eleccion y nos no por tuma un  riesgo y laga nan sigui perhudica nos yiunan. E aña aki IDEALISMO ta bay vence materialismo!