Home Uncategorized Famia Farro di Sabana Liber feliz cu bishita y trabou di Prome...

Famia Farro di Sabana Liber feliz cu bishita y trabou di Prome Minister Mike Eman

SHARE

ORANJESTAD – Un di e casnan cu Minister President Mike Eman a bishita diahuebs ultimo durante e programa di Accion di Bario, tabata esun di Sra. Teresita Farro, conoci cariñosamente como ‘Chita di Don Coy.’ Aki e mandatario a ricibi un bon bini masha caluroso, ademas di un combersacion ameno cu Sra. Chita y su yiu muhe Marcia. Aki nan a expresa nan aprecio pa e manera con e mandatario ta yega cerca di e ciudadanonan, pero tambe nan satisfaccion grandi pa e manera con Gobierno ta manehando e pais.

Sra. Chita a conta di e experiencia di su bishita bisando cu esaki tabata “hopi bon trankil y bunita.” Tambe a bisa con “a combersa un poco, mi a mustre kico falta. El a priminti nos luz cu nos ta bay haya.” Esey ta un promesa cu a bira realidad e mesun anochi como parti di otro programa di Gabinete Mike Eman II, esta ‘Luz den Bario.’ Cayanan di Montaña y Seroe Janchi tambe a haya puntonan di luz publico e siman ey.

Marcia Farro, Sra. Chita su yiu muhe ta comparti e sentimento di su mama. “Mi ta full out cu Minister Mike Eman. E ta pasa su mes den e bario pa papia cu e hendenan y asina e ta mira kico ta e necesidadnan y ta traha riba nan.” E ta indica cu e si ta mira hopi cos di Aruba cu a bay dilanti dunando como algun ehempel e edificionan cu a wordo restaura y awo luz y cayanan cu a traha.

Refrieiendo na e maneho di Gobierno, a sigui bisa: “Ami si ta kere cu e ta un bon direccion. E ta traha pa e hubentud. Mi ta wak cu esnan poni pa haci e trabou, bo ta mira e ambio y hopi a bay dilanti. Den tur tereno mi a mira baymento dilanti. Ami si ta contento.”

Prome Minister a gradici nan pa e sosten y a renoba su compromiso cu nan di sigui traha pa e bienestar y progreso di Aruba.  Bisando ayo pa sigui den e ruta di bishitanan riba e diahuebs mainta, Sra. Chita a expresa na Prome Minister Eman: “Danki pa e bishita y mi ta hopi contento cu e bishita y sigui traha asina pa Aruba.”