Home Uncategorized Assistant Coach di SV Britania, Jonathan Lake: Britania ta gana Copa Betico...

Assistant Coach di SV Britania, Jonathan Lake: Britania ta gana Copa Betico Croes pa di 7 biaha “E titulo aki ta nifica hopi pa nos”

SHARE

ORANJESTAD, Aruba – 29 di januari 2017: Den tur skina Arubianonan a uni pa conmemora e fecha natalicio di Betico Croes. Un di e eventonan cu a hala mas atencion riba e dia aki tabata e final di Copa Betico Croes organisa pa Arubaanse Voetbal Bond (AVB), cu a resulta den un tremendo wega di futbol entre SV Britania y SV Dakota.

Durante henter dia fanaticonan di nos futbol y esunnan cu a sali caya pa celebra e dia por a gosa di un mercado yena cu cumindanan dushi y hopi mas, pa despues sigui cu e wega mes den anochi na Stadion Guillermo Prospero Trinidad.

Despues di un campeonato intenso unda teamnan mester a hunga un schedule pisa e anochi di dia 25 di januari e dos grandinan di nos futbol local, Britania y Dakota a enfrenta otro pa 90 minuut y na final Britania a resulta campeon.

Assistant Coach di Britania y un di nos gran futbolistanan, Jonathan Lake a expresa: “Awe nos a titula campeon y nos ta hopi contento cu e resultado aki.”

E astro di futbol di Aruba a sigui splica cu “Preparacionnan tabata hopi bon. E weganan di pre-final tabata tras di otro pero toch e muchanan a sa di hunga bon riba veld y nan a compronde e mensahe. Hopi biaha den futbol, mas ainda, ora ta yega final tin hungadornan cu pia un tiki pisa, nan ta un tiki cansa y ta haya falta di consentracion aki aya. Esaki ta trece un tiki desbentaha pero e dos golnan den tempran a yuda nos. Si nos a score e di tres y cuater mesora lo no a pasa den e drama te na ultimo, pero pa e fanaticonan cu a bin gosa di e wega el a brinda un futbol exitante yen di accion,” asina Jonathan Lake a bisa.

E coach a sigui splica cu e titutlo di e aña aki tin hopi nificacion pa e team… “nos a gana Copa Betico bek pa di 7 biaha. Ami mes a gan’e 3 biaha hungando y awor di 4 como coach y assistant coach. Tin hungado cu tin 7 tambe, Derwin Donata y nos ta hopi contento cu su presentacion. Britania ta King di Copa Betico y nos ta mira padilanti pa mas!”