Home Uncategorized Presidente di AVB Ing. Richard Dijkhoff: Final di Copa Betico a demostra...

Presidente di AVB Ing. Richard Dijkhoff: Final di Copa Betico a demostra cu futbol di Aruba ta briyando atrobe Stadion yen cu hopi ambiente, Britannia Campeon , un fiesta!

SHARE

ORANJESTAD, Aruba – 29 di Januari 2017: Copa Betico a yega na su final den un forma tremendo. Cu golnan di Reinir Peraez y Luis Estrada pa Britannia y Nickenson Paul pa Dakota , e gran final 2-1 a keda marca y Britannia ta celebra Campeon pa di 7 bes. Arubaanse Voetbal Bond (AVB) ta hopi entusiasma di por mira cu futbol na Aruba ta briyando un biaha mas. Ing. Richard Dijkhoff, Presidente di AVB a expresa cu esaki ta locual nan a traha p’e “y mirando un stadion yen den e forma aki e ta yena bo cu satisfaccion”.

Aunke tabata Dia di Betico cu actividadnan henter dia y cu hopi hende cansa, tog nan a sa di yega stadion. Tabatin un cantidad asina grandi di fanatico, cu AVB ta mas cu contento cu locual nan ta logrando. Segun Richard Dijkhoff, esaki ta muestra cu ta aprecia e trabao, cu tin bon weganan, ta topa un bon ambiente y tin full un otro concepto rond di e wega di Copa Betico. Awor AVB ta nota e resultado di nan esfuerzo. A tuma tempo pa por a compronde e concepto nobo. E partnernan a cuminsa kere den locual AVB ta bin ta traha riba dje den e ultimo tres añanan, el a agrega.

“Esaki ta e direccion nobo cu Arubaanse Voetbal Bond ta bayendo, no solamente na Aruba. Nos ta hayando reconocimento tambe internacionalmente cu locual nos ta bin ta haci. Nan a acerca nos pa nos forma parti di FIFA, CONCACAF, pero tambe CFU den e caso aki pa motibo cu manera nos ta mira, nos ta trahando duro pa nos por lanta e nivel di futbol”, asina e Presidente di AVB a duna di conoce.

El a enfatisa cu ta hayando hopi bon cooperacion di Minister Schwengle. El a kere den e producto futbol y el a para banda di AVB locual ta duna mas confiansa pa sigui padilanti.  Lotto tambe ta forma parti di e famia, tin Subsidie Commissie y nan ta keriendo den AVB como e bond di mas grandi.

Por mira e resultado ya cu no solamente ta keda na palabra. Por mira hechonan. “Pa prome biaha den e ultimo 13 añanan ta mira un stadion yen, cu hopi ambiente, musica, tur hende contento, un fiesta”.

Segun Ing. Richard Dijkhoff, esaki ta locual kier logra pa futbol y banda di esaki tambe ta trahando riba e parti di tereno. Ta trahando riba diferente nivel pa por drecha futbol na Aruba.