Home Uncategorized Atraco arma y brutal riba habitantenan di un cas, lagando un cabayero...

Atraco arma y brutal riba habitantenan di un cas, lagando un cabayero herida

SHARE

Tanki Leendert,- Diadomingo algo pasa di mey anochi, Central di polis ta haya un yamada di Central di Alarma cu un rato pasa a sosode un atraco arma y basta brutal riba habitantenan di un cas na Tanki Leendert. Mesora ta manda varios unidad di polis na e sitio.

Na yegada di e prome patruya nan ta topa cu e famia na e cas y e doño di cas ta contanan, cu nan tabata sinta den sala cu e porta habri mirando television, na momento cu dos homber di habla spaño, cara tapa, arma cu un revolver caliber 45, ta drenta paden y ta cuminsa exigi placa.

Na e momento ey e famia no tabata tin niun cent cash cu nan, e atracadornan no kier a bay man bashi y a pasa man pa 5 cellular, algun joyas y un cartera. Prome cu nan a bandona e sitio nan a dal un di e habitantenan hoben cu e cabo di revolver riba su cabes, heridando esaki.

Un di e atracadornan tabata bisti cu un flanel cora cu jeans y e otro tabata bisti cu un flanel oranje cu jeans. E atracadornan despues di a bandona e sitio a core bay direccion zuid.

E atracadornan a bay cu tur e cellularnan di e cas y na bisiña nan a bay bati bentana pa por a yama polis.

Ambulance a wordo pidi pa trata e hoben cu a wordo herida pa e atracadornan, despues di a trat’e na e sitio, a transport’e pa hospital.

Varios unidad di polis, atraco team y departamento technico di polis tambe a presenta na e sitio pa mas investigacion.

Mirando cu e tabata un experiencia hopi traumatico pa e miembronan di famia, a pidi pa presencia di Slachtofferhulp.

A para bira cu ni television bo no por sinta mira mas bo den sala cu porta di cas habri. E biaha aki un famia arubiano humilde sinta ta disfruta di su diasabra anochi ta bira victima di atraconan brutal asina, bo nunca sa ken ta e siguiente of ki dia e atraconan aki ta yega na un fin.

Aruba dia pa dia ta cambiando, e situacion ta birando hopi peligroso, tur dia tin atraconan ta wordo cometi ,si no ta riba negoshi, ta riba casnan di famia of riba un simpel persona canando riba caya bayendo su cas.
Tur hende por ta victima di atraco, antes tabata negoshinan, lugarnan di lotteria, despues casnan di commerciante, awendia cualke persona su number por hunga y bira un victima di un atraco.

Hopi hende ainda ta confia cana nan so riba caya anochi of laga yiunan so den cas. Semper cera cas bon y no confia laga niun mucha nan so mas na cas, paso e atraconan a cuminsa bira mas y mas violento, ultimamente nan ta agrediendo nan victimanan.
Spera cu pronto bin un fin na e ola di atraco aki, cu desde 1 di januari 2017, casi tur dia tabata tin un of mas atraco, intento di atraco, asalto of robo.