Home Uncategorized Parlamentario mr. Xiomara Maduro: “Hobennan di Colegio San Antonio tabata di bishita...

Parlamentario mr. Xiomara Maduro: “Hobennan di Colegio San Antonio tabata di bishita na Parlamento”

SHARE

Diabierna ultimo Parlamento di Aruba a recibi bishita di hobennan di klas 2 di Colegio San Antonio Mavo cu a bin busca informacion riba kiko tur ta encera e trabou na e Parlamento di nos Pais. Cu sumo placer nos a scucha e diferente preguntanan di nos hobennan y nos a purba contesta tur nan preguntanan, pasobra e ta necesario pa educa nos hobennan riba e proceso democratico na nos Pais.

 

Nos mester realisa cu ta e hobennan di nos Pais lo ta esnan cu mester bay biba cu e consecuencianan di e decicionnan cu awe ta wordo tuma door di e Parlamentarionan y Ministernan di nos Pais. Pesey ta nos deber como politico pero tambe como cuidadano di nos Pais pa tuma tempo y splica nos hobennan for di jong caba kiko ta politica, con decicionnan ta wordo tuma na nos Pais y mas importante con nan por influencia e decicionnan aki. Ta nos responsabilidad pa brinda nos hobennan educacion riba e historia y proceso politico di nos Pais pa asina ora nan alcansa e edad pa por vota, nan por ta bon educa politicamente pa por forma nan propio opinion y vota na un manera conciente.

 

Un palabra di danki ta bay na tur e educadornan cu ta tuma tempo pa trece nos hobennan na Parlamento di Aruba pa asina nan tambe por sera conoci mas di serca cu e politiconan y e proceso democratico di nos Pais. Danki na juffrouw y hobennan di Colegio San Antonio pa e bishita na Parlamento di Aruba.