Home Uncategorized Mireille Sint Jago di MEP: Cu Michelle Hooyboer-Winklaar ta regala ISA un...

Mireille Sint Jago di MEP: Cu Michelle Hooyboer-Winklaar ta regala ISA un subsidio di miyones ta inaceptabel!

SHARE

Na prome lugar, mi no tin nada contra International School Aruba, ISA. Locual mi ta contra ta pa fondo publico wordo uza pa subsidia un scol priva. E decision pa e programa di GED wordo ehecuta door di ISA entrante augustus 2017, ta uno cu mi ta haya masha straño pasobra normalmente un GED ta wordo ofreci door di un scol publico.

GED ta para pa General Education Development program. E ta e equivalente na nos nivel di Mavo, pero na Merca y Canada e ta wordo ofrece na scolnan cu ta ofrece educacion pa adulto, centronan pa comunidad y na scolnan publico. Cu Minister Hooijboer-Winklaar a dicidi pa duna un scol priva miyones di subsidio pa ehecuta e tarea pa educa studiantenan cu no a logra un diploma den nos mesun sistema di enseñansa ta simplemente inaceptabel. Aki placa publico ta wordo derocha pa un scol priva, cu apenas por sobrevivi na Aruba?

Na di dos lugar, alumnonan na Aruba no ta haya les na e idioma Ingles. Ora bo ofrece 200 studiante cu a drop-out pa haya un di dos oportunidad pa logra un diploma door di haya les anochi pero na Ingles, como Minister di Enseñansa bo ta manda tres mensahe pa e mesun comunidad: 1) Hulandes como idioma di Instruccion TA un problema, pero bo no kier haci nada pa cambia esaki. Con otro mi por interpreta cu un alumno cu a faya den e sistema di enseñansa na Hulandes ta wordo supone pa ta exitoso na Ingles den un programa educativo cu ta traha pa studiantenan cu a haya les na Ingles henter nan bida? 2) Abo como Minister no kier soluciona e problemanan cu nos tin den nos sistema di enseñansa door di inverti den prevencion y profesionalisacion di e cuerpo di maestronan. 3) Bo NO tin confiansa den e scolnan publico di bo MESUN departamento, si no, lo bo a scoge pa ofrece e programa aki na EPI of un otro scol publico.

Kico lo por ta e motibo pa un Minister di Enseñansa di Aruba tuma e decision pa ofrece e GED na International School? Pa contesta e pregunta aki nos lo mester sa e agenda secreto di Minister Hooijboer-Winklaar. Mescos cu e lo tawata tin un agenda secreto ora di cambia e seguro di studiantenan pa uno inferior faboreciendo cierto hende un biaha mas cu placa di pueblo. Nos tur por wak cu tur su desaroyonan den educacion ta dirigi pa promove mas studiante bay studia na Canada, aunke tin opcionnan hopi mas economico disponibel den otro paisnan, caminda studiantenan por studia POR NADA! Ami lo no keda sorprendi si un dia nos haya sa cu aki tambe lo tawata tin otro motibonan cu a pone Minister di Enseñansa di Aruba faborece un scol priva cu fondo publico. Mi no ta bisa cu pasobra varios (ex-) Minister y (ex-) Parlamentarionan di AVP tin yiunan cu ta bay ISA, cu esey lo a causa pa un scol priva haya fondo publico. Mi no ta bisa cu Michelle Hooijboer-Winklaar lo tin dealnan lucrativo cu Universidadnan na Canada y Merca. Locual SI mi ta bisa aki ta cu e ta straño y inaceptabel, cu miyones di subsidio di fondo publico ta bay pa un scol priva! P’esey, digno pueblo di Aruba mester ta consciente ora nan bay vota. Pa mi, esey ta primordial! Ta p’esey mi a subi lista na 2013 di un partido cu un trayectoria impresionante. Unico cos cu mi por bisa ta, cu partido MEP bou liderazgo di Evelyn Wever-Croes, pueblo por ta sigura cu Idealismo lo vence Materialismo.