Home Uncategorized Personanan ta usa arma di candela automatico pa tira riba un Altezza...

Personanan ta usa arma di candela automatico pa tira riba un Altezza na Madiki

SHARE

Madiki – Dia di Betico, diaranson den careda di 11:25 di anochi varios zonido di tiro a wordo scucha den Madiki. Autoridadnan, e varios unidadnan di polis, a mobilisa dibiaha pa bay e caminda indica, cual ta Madiki 31. Momento cu autoridadnan a yega e sitio nan a bin topa un Altezza y su ocupante.

E persona a informa polis cu un rato prome na altura di Roxden e mira e Kia Rio color cora. Anto despues di algun minuut e mesun Kia Rio aki ta pasa tira mas cu 10 biaha riba su auto, e Altezza. Esaki a sosode altura di Anglo Kleuterschool. Ora cu polis a bay tira bista riba e Altezza nan a mira cu tawata tin como 3 impacto di bala.

Despues polis a bay un otro area den cercania di e adress menciona pa motibo cu akinan posiblemente e Kia Rio tawata scondi. Esaki ta banda di un cas bandona unda cu e Altezza a pasa y nan a los tironan riba dje. Den e potretnan por mira varios huls riba caminda.
Ta ser papia cu ta un arma automatico o semi automatico involvi den e caso aki. E departamento forensico di polis a presenta na Madiki 31 unda e Altezza a bay para y tambe na e otro sitio caminda e Kia Rio tawata scondi pa asina tira riba e Altezza. Un takelwagen a wordo pidi pa asina bay cu e Altezza pa autoridadnan por haci mas investigacion.
E caso aki ta uno hopi serio caminda mester bin un solucion rapido, tiramentonan asina aki pa loco por tin consecuencia pa hende inocente.