Home Local Oficina di Turismo orguyosamente ta colabora cu Green’s’Cool riba campaña di tas...

Oficina di Turismo orguyosamente ta colabora cu Green’s’Cool riba campaña di tas re-uzabel

SHARE

Oranjestad- Aportando na un desaroyo sostenibel, Aruba Tourism Authority ta orguyoso di por contribui na un iniciativa manera esun di e tas reuzabel di Green’s’Cool. Manera a wordo comunica pa varios tempo den media, desde di 1 di januari 2017 no ta permiti negoshinan pa duna nan clientenan un tas di plastic mas ora cu nan bin hasi compras.

Aruba Tourism Authority ta reconoce e importancia di promove uzo di tasnan reuzabel bou di ambos e poblacion di Aruba y e bishitantenan. Mirando cu nos ta ricibi alrededor di 1.8 miyon bishitante riba nos isla a base anual, ta importante pa maneha e “carbon footprint” di nos bishitantenan. Oficina di Turismo tambe kier aporta na e conscientisacion di nos bishitantenan riba entre otro e ley vigente. Lo haci esaki na diferente manera, e.o. por medio di distribucion di tasnan reuzabel bou bishitantenan, informa nan via website aruba.com y otro plataformanan online, y comparti internacionalmente e noticia positivo di e ley cu ta elimina uso di saconan di plastic . Alabes, A.T.A. ta trahando cu socionan pa aloca borchi rond nos isla consientisando nos bishitantenan di diferente reglanan cu mester tene cuenta cu ne. Bishitantenan lo ta asina mas educa y yuda cuida nos isla.

Green’s’Cool y su campaña di pintamento

Green’s’Cool ta un fundacion cu tin como meta pa educa y stimula e comunidad di Aruba pa ta mas conciente di nos miedo ambiente por medio di metodonan inovativo, rendabel y “fun”. Conforme e meta aki, Green’s’cool a lansa un campaña unda ta invita comunidad di Aruba pa diseña un tas “green”. Comunidad completo ta bonbini pa participa. Lo ta bai tin 4 categoria cu por participa aden: di 6 pa 12 aña, 13 pa 21 aña, 22 pa 35 aña y e delaster categoria ta di 36 aña bai ariba. Tur diseño mester wordo ricibi prome cu 10 di maart 2017, unda dia 18 di maart lo saca un ganador for di cada categoria. E diseñonan ganador lo wordo usa riba e tasnan reuzabel cu ta wordo imprimi riba material “biodegradable.” Mirando cu nos a caba di celebra 30 aña di status aparte, Green’s’Cool kier focus riba con nos ta mira nos fututro y asina a scoge e tema pa e campaña: Con abo ta wak Aruba aki 30 aña, esta naa 2046?  Diseño di e tas lo mester ilustra esaki pa medio di pintura o texto.

Prohibicion di saco di plastic

Pa varios tempo caba Aruba tabata trahando riba un ley unda ta prohibi e uso di saco di plastic, specialmente esunnan cu ta wordo duna na varios establecimento ora di hasi compras. E meta tras di e ley aki ta pa reduci e cantidad di plastic cu ta drenta nos naturalesa y causa daño na nos medio abiente y fauna. Un estudio a wordo conduci pa asina evalua e consumo y impacto cu e saconan di plastic tin. For di estudio a sali cu mas o menos 30 miyon di saco di plastic ta wordo uza na Aruba den un aña. Parlamentario Donny Rasmijn a propone un ley, abase di e resultado saca for di estudio, unda ta prohibi negoshinan pa duna nan cliente e saco di plastic ora di hasi compras. E ley aki a wordo aproba y a bai na vigor desde 1 di januari 2017.

Aruba Tourism Authority conhuntamento cu Green’s’Cool kier invita comunidad henter pa  participa na e campaña: Con abo ta wak Aruba na 2046? Pa mas informacion tocante e campaña por bishita greenscool.org of e Facebook pagina: GreenSCoolAruba.