Home Uncategorized Oficina di Turismo kier gradici tur cu a forma parti na e...

Oficina di Turismo kier gradici tur cu a forma parti na e projecto ‘Cu mira pa futuro’

SHARE

Oranjestad- Oficina di Turismo, Aruba Tourism Authority (A.T.A.), ta sumamente contento di por a mira hopi interes di e pueblo Arubano durante e tres anochinan informativo unda a dialoga ariba e desaroyo di e producto turistico di Aruba. Manera ta conoci, A.T.A. ta trahando conhuntamente cu varios socionan den gobierno, sector priva y NGO’s ariba un plan di desaroyo duradero (Destination Development Plan) pa cu Aruba su producto turistico.  E plan aki ta carga e titulo ‘Cu Mira pa Futuro’. Pa formalisa un plan balansa, Oficina di Turismo a dialoga cu e pueblo di Aruba riba varios topiconan cu ta toca ambos nos industria turistico y nos comunidad. Esaki ta den mesun linea cu loke  A.T.A. ta comunica y firmamente ta kere aden, cual ta un Aruba dushi pa biba, ta un Aruba dushi pa bishita.

A.T.A. a cuminsa cu e anochinan informativo dia 17 di januari na San Nicolas (YMCA), sigui pa Paradera (MFA)  dia 18 y na Noord (MFA) dia 19. CEO di Aruba Tourism Authority, Ronella Tjin Asjoe-Croes, a hiba palabra yamando un y tur bon bini y elabora riba e rol di A.T.A. Tambe a splica cu ta cardinal pa nos desaroya Aruba den un forma sostenibel pa asina por mantene e producto turistico na un nivel mas halto. E ekipo di A.T.A. a prepara varios ehercicio cu ta guia e combersacion pa asina compronde esnan presente nan preocupacion, vision y opinion den un forma structura. Por medio di esaki a midi e sentimento di e comunidad pa cu nos isla y su desaroyo. Asina tambe tabata tin ehercicio unda esnan presente por a indica con nan lo priorisa  aspectonan cu tin di haber cu hospitalidad, seguridad, nos playanan y cultura. Tambe a midi e pensamento di e ciudadanonan presente riba e topico di variedad riba areanan di restaurant, hotel y tienda. E ciudadanonan presente a vocifera cu nan ta hopi orguyoso di nos cordialidad, hospitalidad y cultura, cu hunto ta forma nos identidad. Adicionalmente, hopi tabata di opinion cu tin areanan riba nos isla cu ta “overdeveloped”, cu ta concerni pa cu e nivel di seguridad y cu nos mester ta mas critico. E resultando di e tres anochinan lo wordo agrega hunto cu resultado di e diferente sesion cu tabata tin cu socionan pa asina presenta e Destination Development Plan den luna di maart.

Oficina di Turismo sigur tabata contento cu e participacion pa cu e anochinan informativo aki y kier gradici tur cu tabata presente. Sigur ATA lo tene comunidad, como tambe su socionan na altura di e desaroyonan di “Cu Mira pa Futuro”. Tambe lo tin mas oportunidad den futuro unda comunidad lo por vocifera opinionnan por medio di Facebook y e website di ‘Cu mira pa futuro’ por medio di encuesta.