Home Local Corina Linssen: Tienda di Educacion contento cu hunto cu MFA por drenta...

Corina Linssen: Tienda di Educacion contento cu hunto cu MFA por drenta mas den bario

SHARE

ORANJESTAD – Tienda di Educacion, hunto cu Fundacion Anti Droga Aruba, Centro Kibrahacha y Telefon pa Hubentud, ta e organisacionnan cu ta forma parti di e prome tanda di charlanan den bario. Esaki ta den cuadro di e programa Siman di Informacion organisa pa MFA Noord y MFA Paradera bou direccion di Ministerio di Asuntonan General. Corina Linssen, coordinador di Tienda di Educacion a expresa durante e conferencia di prensa cu nan ta contento di a wordo acerca y cu awo tin oportunidad pa yega mas cerca di e hendenan den bario.

“Nos ta hopi contento cu nos ta participa na e siman di informacion cu MFA Noord y Paradera ta organisa pa pueblo di Aruba, specialmente pa bario di  Noord y bario di Paradera por haya mas informacion tocante topiconan cu ta encera tur cos social, bida, tur pregunta, etc.,” Linssen a comenta.

Tienda di Educacion ta duna sosten den forma di conseho na e mayornan cu tin biaha tin pregunta y tin biaha tin preocupacion di con nan mester lanta nan yiunan. No tur ora nan sa unda bay pa haya contesta. Awo e organisacion ta contento di tin e posibilidad di conscientisa pueblo, e mayornan y educadornan. Ta bay ofrece un total di cinco charla enfoca riba educacion, con pa lanta y cria bo yiunan.

E prome ta ‘Comunicacion entre Abo y bo Yiu’, esta na cua manera por hacie y cua ta e maneranan adecua; di dos ta ‘Norma y Balor’, refiriendo na e reglanan y con bo ta pone nan. Tambe tin ‘Educacion Sexual,’ cual ta un topico delicado, pero importante pa bo sa como mayor kico bo ta haci cune; y por ultimo tin ‘Fase di Desaroyo 0 pa 10 aña’, y Fase di Desaroyo di 11 pa 22 aña. Lissen ta splica cu den e ultimo aki tin cos cu ta hopi importante pa bo sa como mayor, como por ehempel unda bo yiu ta.

“Aworaki nos ta drenta mas miho y mas facil den e barionan. Un MFA ta conoci, pero no tur ora un Tienda di Educacion ta bon conoci,” e coordinador a bisa. E telefon pa comunica cu Tienda di Educacion y caminda mayornan por haya contesta ta 161 y yamadanan ta completamente gratis. Pa mas informacion riba e Siman di Informacion, fecha, ora y luga, ta invita un y tur pa keda atento na prensa local, pero tambe por bishita e pagina di Facebook: MFA Noord Aruba of MFA Paradera Aruba.