Home Uncategorized Anochi ta sera cu otro atraco violento unda un persona ta keda...

Anochi ta sera cu otro atraco violento unda un persona ta keda seriamente herida

SHARE

Sint Peterhillweg, San Nicolas – Dialuna anochi pa mas o menos 10’or, un biaha mas un persona ta wordo atraca. E luna aki a habri cu bastante atraco. Cuidadanonan ta wordo atraca no solamente riba caya, pero tambe den nan mesun hogar y cu chance di wordo maltrata tambe.

Den e siman cu a pasa varios caso di atraco a sosode di unda mayoria di esaki a wordo cometi door di persona(nan) arma. Atracadornan ta hopi activo e dianan ki, specialmente pariba di brug. Ta di nota cu e anti-socialnan aki ta scohe hopi biaha personanan mas vulnerabel, manera un persona di edad pa asina haci e abusonan aki cu nan.

E tendencia di violencia cu e atracadornan aki tin ta pone nos comunidad na peliger. Nan no ta respeta ni anciano/a y ni hogar di hende.

Abou por lesa declaracion di Sra Rasmijn di cuerpo policial di kico exactamente a pasa dialuna anochi :

” Pa mas o menos 21:45 Central di polis ta haya jamada di alarm central cu un atraco lo mester a tuma luga riba un hende homber na Sint Peterhillweg.  
 
Na jegada di patruya nan  ta bin haya un hende homber benta abao y tur na sanger. E prome melding ta bisa cu nan lo mester a tira e cabayero, pero esey no tawata e caso. E cabayero tawata tin sla serio na cabez. Un herida di 10cm cu tawata sangra profusamente. 
 
Ta parse cu e 2 hombernan lo mester a dal e cu un obheto duro na su cabez dos pa tres biaha y a ranca su zijtas y bai cune.  E dos hombernan no a papia nada y tawata hopi scur y e no por wak nan bon. 
 
Un auto pasando eybanda a para pa juda e meneer y na momento ey un di e dos atracadornan a los dos tiro den laira. 
 
Patruya  a cuminsa cu un buskeda, pero no a topa cu nan. Atraco team a presenta hunto cu  polis forensico y tambe slachtoffer hulp. 
 
Ken cu por a wak algo por jama tiplijn 11141″.