Home Uncategorized TNO a demostra progreso di proyecto di algen na Prome Minister Eman:...

TNO a demostra progreso di proyecto di algen na Prome Minister Eman: Aruba por exporta pa mundo e conocemento cu a wordo desaroya aki cu algen

SHARE

ORANJESTAD – Diferente experto di TNO, instituto cu ta trahando riba e proyecto di cultivo di algen riba tereno di refineria di Aruba, tabata presente den e encuentro cu Prome Minister Mike Eman pa duna un relato riba progreso di preparacion y implementacion di un laboratorio di algen den e refineria.

Pa e parti aki di e proyecto di cultivo di algen ta hunga un rol importante participacion di Ruurd Schoolderman, kende ta Consehero Strategico di Energia trahando cu TNO Caribe. Na final di e encuentro el a enfatisa cu e programa di algen ta cuadra hopi bon cu e ambicion di Aruba pa desaroyo di un economia di conocemento. “Esaki ta un area di desaroyo completamente nobo y ta duna nos e oportunidad pa haci conexion cu diferente universidad y institutonan cientifico pa crea conocemento nobo na Aruba. Aruba por exporta pa mundo e conocemento cu a wordo desaroya aki.”

Ya caba, el a splica, a start combersacion cu diferente empresanan di tecnologia, principalmente na Europa unda a cuminsa sondea e diferente tecnologianan disponibel cu ta adecuado pa wordo aplica den e condicionnan na Aruba. Como cu e proyecto ta den fase inicial  ta simplemente hiba combersacion cu e proveedornan di tecnologia y posibel inversionistanan cu lo kier participa den e proyecto. E siguiente paso ta crea e entidad den cual e proyecto aki por wordo desaroya y a sigura cu esaki mester ta un esfuerso di un consorsio: e refineria, Gobierno (pa financiamento y maneho), proveedornan di tecnologia y investigadornan. E ultimo aki ta importante pa motibo cu e ta un proyecto inovador, unda cu cosnan nobo lo mester bini dilanti.

E persona cu a traha riba un gran parti di preparacion di e proyecto ta Emile Elewaut, Director di Relacion Internacional riba asuntonan di Energia, Raw Material y Maritimo na TNO. E reunion mes, Elewaut a splica, tabata e paso final den e estudio cu el a bin ta haciendo riba reduccion di emision di CO2 den e refineria. “E reunion tabata fructifero pasobra mi por a duna algun conseho importante con pa logra un reduccion di CO2 uzando algen. Esaki a wordo bon ricibi den e reunion.”

E experto di TNO a splica cu e tabatin dos tarea importante pa traha riba nan. Na prome luga, busca e posibilidad pa un planta piloto pa trata e CO2 cu algen y e di dos tarea ta pa lanta esaki mas rapido posibel. “Nos como TNO a logra pone dos proposicion riba mesa pa cual nos ta kere cu e reunion tabata fructifero.” El a enfatisa cu e no a aserca e tema aki como un investigacion riba e forma normal, pero di un forma cu ta buscando un logro grandi den reduccion di CO2 y produccion grandi di algen. Ta papia di un emision di casi 200 miyon ton di CO2 diariamente. Esaki ta hopi produccion di algen y mester pensa kico ta haci cu nan despues. A studia diferente oportunidad pa trece un producto riba mercado. Esaki por ta gas, bio-diesel of productonan grandi manera Omega, “food additive” y productonan di salud.

Aunke cu e forma aki no ta nobo, pero na e escala grandi cu e ta bay wordo haci na Aruba si ta inovativo.  “E hecho cu nos ta sinta na mesa cu Prome Minister y discuti e tema, ta un prueba cu Aruba ta dispuesto y tin e staf tecnico pa realisa e proyecto aki,” Elewaut a expresa.