Home Uncategorized Na caminda pa instalacion oficial di HOT: “200 hoben a bira miembro...

Na caminda pa instalacion oficial di HOT: “200 hoben a bira miembro di HOT cu un entusiasmo halto pa mira un cambio di direccion riba Aruba”

SHARE

Diaranson na Cede di MEP, e hala hubenil di MEP esta HOT (Hubentud Orguyoso y Talentoso) a tene su prome encuentro cu esnan cu ta desea di bira miembro activo di e organisacion. Durante e anochi aki un gran cantidad di hoben a inscribi y a haya nan Hot T-Shirt pa asina por drenta den e programa intenso y hopi interesante na caminda pa eleccion 2017.
E entusiasmo di e hobennan tabata hopi halto y por a sinti den nan expresionnan cu nan ta desea di siña conoce mas loke ta politica. Varios pregunta a wordo haci na e candidatonan di MEP cu tabata presente cu ta un señal cu e hubentud tin su preocupacionnan. Na final di e anochi mas di 200 miembro nobo a inscribi, esaki sigur ta un bon señal cu e hubentud tambe kier mira un cambio positivo bek riba Aruba.
E peticion pa mas miembro forma parti di HOT ta grandi y p’esey ta organisa un happening dialuna 23 Januari na e Hot zone na Savaneta dilanti Wintergarden supermarket, na e zona unda lo tin show y concierto di MEP dia 24 januari pa celebracion di dia di Betico. Desde 6pm pa 8pm por pasa inscribi y haya bo HOT T-shirt. Lo tin musica di miniteca pa trece ambiente y tambe lo tin un oportunidad pa haya sticker di Betico y cumpra bo t-shirt pa dia di Betico.
Diamars 24 januari un invitacion ta bay pa henter pueblo di Aruba pa asisti na e tremendo concierto cu Tsunami, Buleria, TBS brassband, Dj, Maykyxon Maduro, MC Robert Yeah y pa cera e anochi Jeon. Durante e anochi aki tambe partido MEP ta instala oficialmente su hala hubenil HOT. Un y tur ta bon bini.