Home Uncategorized MEP: DIA DI BETICO HISA BO BANDERA Y CELEBRA DIA DI BETICO

MEP: DIA DI BETICO HISA BO BANDERA Y CELEBRA DIA DI BETICO

SHARE

STA. CRUZ – Nos ta drentando e siman di celebracion di Dia di Betico. Nos como Arubiano mester ta hopi orguyoso cu nos pais a conose un lider di taya manera Betico Croes, un bendicion real pa un isla chikito manera Aruba. Hopi paisnan grandi ta desea di por a conose un Lider asina.

BETICO A LOGRA E ANHELO DI NOS PUEBLO PA LIBERTAD

Betico a drenta arena politico y a cuminsa su lucha pa conberti e deseo di nos pueblo pa su libertad, den un realidad. Despues cu Betico a uni na e partido politico AVP, y el’a wordo eligi como Lider di e partido, e doñonan di partido AVP a hib’e corta pasobra un CROES no por ta Lider di AVP.
Esey tabata e momento cu Betico a lanta partido Movimiento Electoral di Pueblo, y asina por a lucha pa logra libertad di nos pueblo.

Betico a realisa cu e deseo di nos pueblo pa ta baas den propio cas, tabata existi di basta tempo, pero cu a wordo bandona pa e lidernan di e tempo ey. Un deseo cu a keda bandona pa 30 anja, Betico a sa di conberti den realidad.

Betico a haya un fundeshi, parcialmente basha, bandona pa 30 anja, cu hopi scheur y yerba ta crese den dje. Betico a drecha e fundeshi, caba di trahe, lanta murayanan di e cas di LIBERTAD, basha ringbalk, pone e dak, y dia 31 di december 1985 el’a entrega nos e yabi pa nos lanta nos yiunan den LIBERTAD. Lamentablemente e mes no por a gosa di e libertad ey, pero nos tin e compromiso pa conserva e libertad pa pase pa nos yiunan y nan yiunan.

CELEBRA DIA DI BETICO

Desde awor caba y especialmente riba Dia di Betico demostra bo orguyo di ta biba riba e pais aki. Hisa bo bandera, sali bishita e actividadnan, y ban uni como pueblo.

Partido MEP ta invita bo tambe pa su actividadnan, cuminsando dia 24 di januari, na Savaneta, dilanti Wintergarden. Esaki ta bai ta un celebracion grandisimo, cuminsando cu homenage na lidernan di bario y Caciquenan cu a lucha cu Betico y cu Nel. Despues lo tin entretenimento di bandanan manera Tsunami y Buleria.

Al rededor di 10’or ta toca turno pa e hala hubenil HOT wordo instala oficialmente, y despues e anochi lo caba cu e cantante Jeon LIVE den concierto.

Dia 25 di januari partido MEP ta cuminsa e dia 9.00 am cu Misa na Santa Cruz, sigi pa un Koffie morgen na Cede di MEP di 10 or am pa 2 or pm.

Pa resto di e di abo ta wordo invita pa bishita tur e actividadnan rond di Aruba. Hisa bo bandera y celebra dia di Betico.