Home Uncategorized EVELYN WEVER-CROES: BAN UNI Y CELEBRA DIA DI BETICO

EVELYN WEVER-CROES: BAN UNI Y CELEBRA DIA DI BETICO

SHARE

STA CRUZ – Lider di MEP sra. Evelyn Wever-Croes, den cuadro di celebracion di Dia di Betico ta extende un invitacion nah enter comunidad pa uni y celebra Dia di Betico den union.

“Dia 25 di januari no ta djis otro dia liber na Aruba. Maske cu hopi hende ta contento cu e dia ey ta un dia liber, no ta tur ta realisa su nificacion. Dia 25 di januari nos ta celebra e fecha natalicio di Betico Croes, Libertador di Aruba. Ta danki na e gran homber aki Aruba a haya su Status Aparte na 1986.
Prome cu 1986 Aruba tabata forma parti di Antiyas Hulandes, y apesar cu Aruba tabata tin hopi potencial pa desaroya, bow di constelacion Antiyano Aruba tabata wordo impidi pa desaroya, y hopi inhusticia tabata wordo cometi contra Arubianonan.
Nos hendenan tabata tin un anhelo fuerte di por ta baas den nan propio cas, pero como tur decision tabata wordo tuma na Curacao, Aruba no tabata haya parti husto di locual tabata toke.
Asina a cuminsa lanta bow di e pueblo Arubiano e deseo di bai los di Antiyas Hulandes, pa na Aruba mes nos por tuma nos propio decisionnan, y naturlamente para responsabel pa e consequencianan. Ta danki na e lucha aki cu a culmina dia 1 di januari 1986, awe nos por ta autonomo den Reino. Ta danki na nos Status Aparte nos a crece como un pais soberano den 30 aña y nos por a desaroya nos economia, especialmente turismo. Si no tabata pa e desaroyo ey, awe Aruba no ta unda e ta.
Gran parti di nos pueblo ainda ta corda con cos tabata bow constelacion antiyano. Pero tin den nos comunidad hendenan cu no a experiencia esaki, por ehempel esnan cu a bin biba na Aruba den ultimo 30 aña. Ta importante si pa tur hende sigi ta conciente cu ta danki na e Status Aparte, bow guia di Betico Croes, y e prosperidad cu e Status Aparte a trese pa nos e personanan aki a scohe pa bin biba na Aruba en bes di scohe pa bai biba por ehempel na Curacao, Sint Maarten of otro islanan di Antiyas. Pasobra e Status Aparte a trese prosperidad pa hopi hende.
Ta pesey ta importante pa nos sigi realisa e balor di nos Status Aparte, pa nos por sigi lucha pa conserve.

UNION
Union semper tabata nos forsa, y esey lo sigi ta nos forsa. Betico a logra uni nos pueblo y asina a logra realisa e anhelo di nos pueblo. Esaki ta momento cu nos tambe mester uni pa por enfrenta e retonan grandi nos dilanti.
Riba Dia di Betico, ban tuma tempo un rato pa reflecciona riba kiko Betico y e Status Aparte kiermeen pa cada un di nos. Laga nos celebra e dia aki, acudi na eventonan cu ta wordo organisa rond di henter nos isla. Laga nos celebra Dia di Betico manera un pueblo uni, y orguyoso di locual Betico a significa pa nos, y tur e prosperidad cu nos Status Aparte a trese pa nos cada un.