Home Uncategorized Computernan nobo na Hulpbestuurskantoor ta laga atende e clientenan mas lihe

Computernan nobo na Hulpbestuurskantoor ta laga atende e clientenan mas lihe

SHARE

ORANJESTAD – Manera ta conoci, den luna di december a anuncia cu oficinanan di Hulpbestuurskantoor mester a cera pa algun dia, relaciona cu e modernisacion di e sistema di computer.

Omar Harms, di Ministerio di Asuntonan General, bou di cual e departamento aki ta resorta, a ofrece informa amplio y detaya di e motibonan pakico e cambio aki tabata necesario y con ta hinca den otro. “E sistema tabata draai riba computernan hopi bieu. Tabatin computer cu tabata tarda pa start y di biaha ta pega y asina mester bolbe start. Esey tabata causa hopi frustracion cerca e trahador y e cliente tambe,” Harms a conta.

E proyecto, manera cualkier compania, a rekeri hopi trabou di investigacion, planificacion y instalacion, etc. Lamentablemente, pa motibonan fuera di alcance, manera transporte pa yega Aruba, e duracion di e proyecto a cana mas tempo di loke a planifica. Sin embargo, pa cambio di aña usuarionan por a bolbe haci uso di mayoria servicio y tambe nota un diferencia positivo.

Diariamente ta mantene contacto cu tur Hulpbestuurskantoor den coordinacion cu departamento di Informatica y Tecnologia di Censo cu ta envolvi den e proyecto. Poco poco ta eliminando tur detaye cu ta falta, pero ya por nota un diferencia grandi. Danki na e sistema di Q Flow cu ta e number cu clientenan ta tuma pa haya servicio, ta monitorea no solamente e cantidad di tempo cu ta tuma pa bin na beurt, pero tambe e tempo cu ta tuma pa wordo atendi. E ultimo aki a baha considerablemente.

“Bo ta ripara cu tin hopi menos keho, e computernan no ta pega, nan ta cende mas lihe. Tabatin computer cu no por a manda un email, awo tin e computernan di mas nobo. E no ta full cla ainda, pa fin di luna tur computer ta yega y lo ta ‘up and running’ manera mester ta,” asina e funcionario a finalisa bisando.